La gourmandise, l'avarice et la malhonnêteté sont parmi les pièthes vices qui piaîssent exister et quand i' s'arrivent des cas comme i' y en eut iun Lundi passé, i' méthitent d'être exposés à la pus grande publicité.
Mes lecteurs aithont d'la peine à craithe che que j'm'en vais lus raconter, mais le Caouain était présent et vit de ses propres yiers un exemplye scandaleux de ches trais vices-là que j'ai mentionné, et fut témoin d'un incident qui n'a jamais ieu s'n êgal comme acte de la pus base ingratitude.
Et si m'est permins de m'servi de iune des phrases à Marie Hibou, “ch'est la puthe, pliaine et entchièthe véthité.”
Un moussieu qu'est bain connu par toute l'île et qu'habite la pus grande pâraisse de Jerri, est r'nommé pour être iun d's hommes des pus généreux qui piaîssent y aver, un homme qui jamais n'manque une occasion à faithe pliaîsi à un amin.
Chu moussieu-là est un grand amateur de pêquethie à basse-ieau et a une connaissance approfondie quant à la position de toutes les mathes et toutes les houles ouest qu'i' y a du paisson.
Conséquemment, toutes les feis qu'i' va dans les rotchers il en rapporte tréjous un bouan fricot.
Pour tchique raison incomprenablye, i' compte parmi ses amins un individu qu'habite une pâraisse vaisine. Je l'traite d'individu, car le Caouain ne peut certainement pas l'appeler “Moussieu” ch'tis-là!
Eh bain, s'n amin li envyi une invitation Dimanche au sé, li d'mandant d'aller avec li Lundi matin pêtchi des pihagnes dans les rotchers de l'Etacq.
I' li promins d'aller l'cherchi siez-li avec une automobile et d'aller le r'porter avec sa pêque.
Une invitation patheille ne pouvait pas se r'fuser et notre apôtre n'était pas l'gars pour mantchi une telle occasion ninnetou.
I' fut don ramassé siez-li et transporté siez s'n amin, qui li baîlli un “lunch” dévant que de d'valler à la mathée.
Un jeune homme de la famille était avec ieux et quand i' vinrent à basse-ieau i' trouvithent des pihagnes en quantités et remplithent lus pouques toutes pliaines not'e héros s'étant muni de la pus grande qu'il eut bain d'la peine à r'venin à terre avec sa cherge.
S'n amin, voulant qu'i' remportisse aut'e chose que des pihagnes se dêrangi d'aller à des houles qu'i' connaissait li ramasser treis ou quatre biaux poinclios de tchi qu'il le fit présent.
Arrivés sur l'pliain i' s'minrent à mangi une bouochie, not'e ouaisé se régalant oquo ès frais de s'n hôte.
Les treis poutchies d'pihagnes étaient posées sus la grève et les deux autres hommes s'étaient r'tithés driéthe un rotchi pour lus dêchangi, car il 'taient tous trempès d'ieau salée dépis la tête jusqu'ès pids.
L'individu en tchestion était resté drièthe le camion à côté des poutchies d'pihagnes et ch'tait à chu moment-là que l'Caouain fut témoin d'une action absolument incriyablye.
Deux visiteurs, un moussieu et une dame, qu'avaient veu nos gens ervenin à terre, dévallithent la grève pour vaie lus pêque et tâchi d'en acater pour remporter avec ieux en ville.
I' furent êbahis de vaie une telle quantité de belles crabes et i' d'mandithent au type de lus en vendre quatre.
I' s'y accordi tout-d'suite li, et ou m'craithez s'ou voulez, mais i' prins ches pihagnes-là de dans la pouque à s'n amin!
Le moussieu li bailli un chelin, qu'i' mins dans sa pouchette!
V'là don mes chiers lecteurs les faîts d'un homme qu'ou connaissiz tous bain et je sais que quand je m'en vais vos l'nommer, ous allez tous dithe sans exception.
“Le Caouain est un menteur!”
Mais je peux pourtant l'prouver et je li d'fie de m'dêmenti!
Pensez don si ch'est là les faichons d'un honnête homme!
Se faithe tchéthier allant et de v'nant, mangi un lunch dévant la mathée, un autre opprès, accepter des poinclios que s'n amin li avait ramassé, vendre du paisson d'la même pouque à l'autre et en empaûter les sous!
Et oquo pour comblier tout, il avali un bouan stiffeur de whisky que s'n amin li donni dévant que de l'porter siez-li!
J'appelle chenne un peûle de la prumié trempe, mé!
Et che n'tait ni pus ni mains que l'nommé,
[Que notre “Caouain” s'emballe jusqu'à devenir risible, passe encore, mais se permettre de nommer la personne contre laquelle il fulmine dépasse toute mesure de tolérance et c'est pourquoi ce nom ne sera pas publié. Notre Sieur Caouain devrait bien savoir que même la vérité n'est pas toujours bonne à dire, surtout lorsqu'il s'agit d'individualités. – [Le Rédacteur.]
Caouain
1929
Viyiz étout: