L'autre jour, l'Sieur Caouain vous raconti touote une histouèthe
L'autre jour, l'Sieur Caouain vous raconti touote une histouèthe sur un exemple scandaleux des vices d'la gourmandise, d'l'avarice et d'la malhonneteté, touot chunna à l'entouor d'une pêquethie à basse ieau.
J'en ai oui un p'tit pus long que n'a voulu dithe l'Caouain, car si chein qui vous dit était la pure et entièthe vérithèt, ch'n'tait pas la pleine vérithèt car tchi qu'était marri viyant qu'il n'pouvait pon enlever toutes les pihagnes et tchi qui d'mandi à ses parchionniers s'ils n'avaient pon d'la corde à machine pouor essayer de fagotter tchiques pihagnes d'pus, viyant qu'il n'avait pus d'run dans sa pouque qu'il avait hardi d'mà à porter tellement oulle 'tait chèrgie.
Chunna ch'est d'la gourmandise, Moussieu Caouain, car à chein que j'comprends, il y avait assez de pihanges pouor rempli un trolley et en douonner un fricot à touot l'vaisiné et vouler avèr l'touot à son touot seu est de l'égoisme.
Douard, ly qu'était éttouot à chute pêquethie, n'eut pon de chance. Quant y dépatchi la pouque que sa grand'mère ly avait baillée, il s'aperchut qu'oulle n'avait pus de fonds! Y fallut qu'il l'amathe l'mus qui put et ch'n'est que la maintchie d'une poutchie de pihagnes qui rameni sièz ly!
J'espèthe que la préchaine fais y s'f'ra seur d'aver une bouanne pouque! pouor rapporter une bouanne pêque. Y faut craithe que sa grand'-mère n'avait pon mins ses lunettes quand oulle ly donni chutte pouque sans fonds.
Touot chunna est la pleine vérithèt, et si vous n'voulez pon m'craithe, d'mandez au sien dans l'nom est resté sus l'but du blieu crayon de Boss, qui l'croissi de dessus l'écrit du Sieur Caouain, un miot trop personnel.
* * *
L'avous vu? Tchi chunna? L'grand criminel que touote la police de la paraisse, le Chantgni Jack en tête, cherche d'pis deux ou trais s'maines.
Il est d'nièrr vêtu avec une blianche cravatte! Et ch'est sièz d'Jack d'Hérupe que l'crime a été commis. Quant Jack vit la demi douzaine de victimes, y pensi que l'coupable d'vait être dans l's'envithons et touot drait s'n'alli sièz l'Chantgni ly faithe part de ses soupçons. Il 'tait seur que ch'tait ly, de velours nethe vêtu avec cravatte blianche, point de collet ni d'blianchet, rein qu'un tie.
Mé, j'en ai vu ieune qui ly ressemblai couomme deux gouttes d'ieau, du bord de Grosnez, Chantgni.
J'sais bein et Charlie éttouot que pouor avèr une condamnation y faut trouver l'coupable et ch'est que diantre n'v'la qui n'est pas aisi, car chu coupable peu s'mucchi aisément et tchique fais se jutchi iou qu'nous n'irait certainement pon l'cherchi.
Car chu coupable, ch'est un biau nièrr cat qui, l'autre séthée s'n'alli dans l'poulailly à Jack d'Hérupe et y fit du biau travas avec les jeunes poulets qui fallit jeter sus la maie d'fumi au lieu de les rôtir et d'en faire de buans fricots.
Mais l'coupable couort tréjous à moins qu'il ne se soit méfait en apprenant qu'nous avait mins la police souotre ly.
S'il y a dans la paraisse de vieilles filles qui ont un cât nièrr avec un tie blanc et qui n'voudraient pas qu'une terrible méprinse s'est faite et qu'lus cât paie pouor l'véritable coupable, la milleuthe chose à faithe est de l'mucchi pouor un p'tit temps et de l'empêcher d'aller faithe des “maroah!” dans l'vaisiné iou que l'horrible crime fut commis, car p't'être bein que manque de pouver le happer nous déshallerait bé vite s'n'arme pouor l'tithét.
Chutte affaithe là est la pure, pieine et entièthe vérithêt et si vous voulez en saver un p'tit pus long, d'mandez au Chantgni Jack qui d'pis qu'il est en cherche du coupable n'peut quassiment pas dormir en paix car chaque fais qui ouai un cat la nièth y s'd'mande s'il faut qu'il s'lève bein vite pouor remplir son d'voir!
* * *
Jack de la Rue à l'Ieaue est fort mârri. Et ma fingre il y a tchi car, couomme y s'fait, il a été bein mal servi oprès touot l'travas qui fit pouor l'plaisi de rendre service.
Pus d'autre de “donkey work” pouor mé, couomme y s'faisait et ch'n'est pon mé qui lus aidera l'année tchi veint s'ils veulent avèr une autre fête au manièth.
Ch'est que ly qui fit touot l'travas n'sait pon encouore acheteu combein d'sous que chunna rapporti.
Allons Jack, faut pon s'mârri d'même, car oprès touot ch'tait pouor une buanne oeuvre.
Marie Hibou
1929
Viyiz étout: