Mes lecteurs aithont bain seux 'té désappointés que la Chronique de Mêcredi ne contenait pas un rapport spécial de la séthée Jerriaise à Springfield Samedi au sé, ni autchun commentaithe sus les difféthentes compétitions et les r'merques de l'Adjudicateur, commes les autres gâzettes ont fait touos ches jours ilo sus les sessions en Angliais.
Mais dame! che n'est pas à mé qu'i' faut s'pliaindre. Addressous au Chef, ch'est li qu'à l'contrôle de ches choses-là.
Quoiqu'il est un mio tard, je m'en vais tâchi de comblier la lacune en vos donnant tchiqu'unes de mes impressions.
I'un des membres du Comité ouvri la séthée par offri à l'auditouaithe les extchuses du Président, Moussieu l'Doyen, qui, à san grand r'gret ne pouvait pas être présent.
Il introduit ensuite, l'Adjudicateur, Moussieu l'Merquand, Connaîtablye de St. Louothains et offri à chu moussieu-là les r'mercîments du Comité pour aver bain voulu accepter l'invitation d'entreprendre la tâche.
I' dit que che n'tait pas généralement la couôtume de r'mercier un homme devant qu'il eusse accompli sa bésogne, mais qu'i' s'attendait bain qu'à la fin d'la séthée, i' y aithait trop d'rêmouage dans la salle pour que v'là qui pusse se faithe convenablyement.
Sus chu point-là, par exemplye, i' n'se trompait pas, comme i' fut dêmontré pus tard.
Le dernier dialogue était à peine fini que les gens se l'vithent et tchittaient la salle duthant les discours de l'Adjudicateur.
Ch'tait un geste partitchulièthement mal-poli et qui ne s'sait pas tolethé à autchune des autres sessions de l'Eisteddfod.
Mais il est bain êvident que l'public n'a pas le même respé pour un Adjudicateur local comme il a pour en êtrangi, un fait qu'est, pour en dithe le mains, bain dêplorablye.
Les jeunes gens s'atchittithent diversement bain dans lus classes respectives, mais i' y eut dans plusieurs cas des fautes bain amusantes.
Dans la pièche “Not' vier Lingo,” par A. A. Le Gros, les mousses avaient 'té instruits par tchiqu'un qui evidemment, ne comprenait pas trop bain le Jerriais de ch't auteur-là.
La phrase “séguir une lerme” veurt dithe “sétchi une lerme” pas la “sécouer.”
Dans l'même verset – “J'ter des Souôris, par chin, par là, Par ses chansons, etc.”
Des “souôris,” en français des “sourires,” ne sont pas d'la vermine, et pourtant un assez grand nombre de p'tits compétiteurs le criyaient, car i' pointaient sus l'plianchais en disant “J'tant des souothies, par chin, par là!”
Faut espéther que toutes ches souothies-là aithont 'té rattrapées devant l'Exhibition, ou bain i' f'thont du carnage parmi les provisions qu'i' trouvethont à lus goût.
Le Caouain veurt féliciter tout partitchuliéthement Dlle. Kathleen Du Heaume d'aver gâgni la Coupe.
Ou fut poussée d'bain près par Dlle. Phyllis Gibaut dans la même classe, mais classe, mais i' y avait justement une petite difféthence quant à l'expression, un fait qui êvidemment n'êcappi pas à l'Adjudicateur.
Dlle. Alice Rondel fut êpatante dans s'n interprétation de “Not'e Mauvais Sujet.”
La classe était forte et toutes les jeunes compétiteurs firent bain, mais Miss Rondel nouos raconte chenna dans un style absolument original, donnant un comique à la pièche, que même l'auteur n'avait peut-être jamais imaginé.
Rain d'êtonnant si v'là qu'excite l'admithation de Moussieu l'Merquand.
Le p'tit dialogue “Le Nid,” pour les jeunes gens de douze à tchinze fut admithablyement présenté par touos les p'tits couplyes qu' y prinrent part.
Che fut une pièche bain intêressante et bain amusante, et i' n'y avait pas grand' chose à chouaisi entre les quatre miyeurs.
Le Caouain s'était rendu là tout exprès pour oui Mrs. Chevalier réciter la pièche qu'il avait composé “La Télévision,” et je fus charmé de l'interprétation qu'ou' li donni. Ch'tait superbe. Mais i' fallait s'y attendre, oulle est capablye, chute petite femme-là!
Ch'tait George qui fut pliaichi prumi dans “La Picagneresse,” un assez bouan finissement à sa carrièthe comme contchuthant, car i' pathait qu'il est bain décidé, à cause de s'n âge, de laissi tout chenna d'côté.
Le dialogue “Les Deux Annonces,” fut appathemment bain apprécié par l'auditouaithe et i' n'y avait pas bain des merques entre les difféthents couplyes, mais l'Adjudicateur donnit la palme à tchi qu'ou v'nait, i' n'peut pas y aver deux opinions là d'sus.
L'expérience de Madame Boielle li avait apprins que dans une salle comme la sienne de Springfield i' n'faut pas aver peux de pâler haut si nou veur être entendus par les gens au mitan et au bas de l'appartement et v'là ouest que toutes les autres dames perdithent des points. I'y eut des passages que l'Adjudicateur ne put pas saisi.
Quant à Ernest et George, qu'étaient r'gardés comme infailliblyes à cause de lus succès dans l'passé, lui mémouaithe lus fut défaut et i' restithent là la bouoche ouverte sans pouver continuer. Le pouore George li, en êprouvant à s'rattraper, mantchi un paragraphe tout entchi.
Chet articlye ichin ne s'sait pas complièt s'i' n'contenait pas tchique critique sus l'Adjudicateur.
I' n'y a pas d'doute qu'i' s'atchitti d'sa tâche difficile à la satisfaction générale.
A cause du grand nombre d'itèmes, i' n'eut pas assez d'temps à sa disposition pour faithe grands commentaithes sus les difféthentes compétitions, et ch'est damage sus un sens, car les auditeurs aiment bain que l'Adjudicateur les amuse un mio.
Il est vrai que Jack les fit rithe quand i' dit qu'il avait donné “huiptante” merques à iun des compétiteurs.
Ch'tte expression-là pourtant, n'en était pas iun de s'n invention. Les gens ne s'en servent pas fort achteu mais oulle existe oquo dans certaines pâraisses et ch'tait parfaitement légitime de l'utiliser considéthant qu'i' n'fallait pâler que du Jerriais.
“Quatre-vingt” aithait p't'être sonné trop Français.
I' m'semblyi que Jack était pus ou mains nerveux en présence d'une telle grande populace, mais i' s'sa probablyement pus à s'n aise la préchaine feis.
Caouain
1929
Viyiz étout: