Eh bain, mes chiers lecteurs et léctrices, v'là dêjà l'mais d'Octobre bain avanchi et ou n'y avez pas p't-être bain pensé, mais r'véchin la saison de l'Eisteddford.
Comme le temps s'passe, est-che pon?
I'n'semblye pas qu'y a dêjà un an que j'étions tous à Springfield à la séthée d'Jerriais.
Mais ch'est d'même pourtant et ch'tte année la grande bordée se donne le Samedi au sé le deux d'Novembre et j'm'attends bain qu'ou s'sez oquo tous la comme d'habitude.
Avec ma tchuthiosité usuelle, je m'sis appréchi de tchiqu'uns des membres du Comité et j'ai dêcouvert que les entrées sont oquo pus importantes que les autres années.
Dans le dialogue pour jeunes gens, pas mains de neuf couplyes s'en vont se disputer l'prix, et les classes pour récitations sont remplyies à peu près comme d'habitude.
Le Comité a chouaisi pour les hommes la pièche de Messire Robert Pipon Marett intitulée “La Picagneresse,” et chette chin a attithé quatre contchuthents.
Chinq ou siex dames s'en vont réciter “La Télévision,” par le Caouain, et parmi les contestants, i' y a des dames qu'ont une haute ernommée dans l'Eisteddfod, chein qui devethait faithe chute classe-là bain interessante.
La classe du dialogue pour homme et femme est bain remplyie ettou. Ch'est un dialogue adapté de la comédie “L'Annonce” par E. J. Luce, qu'eut un té grand succès au Oddfellows Hall i' y a tchiques années.
Not'e vier amin, Dan Lêcaudey est iun des caractèthes dans chute piéche-là.
Le succès d'la séthée dêpend hardi sus l'Adjudicateur, et chenna est garanti par le fait que le chouaix du Comité a tchaie sus notre amin Jack Le Marquand, l'estimablye Connaîtablye de St. Louothains, de tchi qu'il est pâlé dans la Biblye.
D'autchuns d'entre vous, avez tchiquefais lu le pâssage “Prends garde à l'homme intègre et considère l'homme droit, etc.”
Eh bain, Moussieu l'Marquand est un homme de même et malgré qu'i' y aitha parmi les compétiteurs un grand nombre de ses amins et des êfants de ses amins, chenna n'aitha autchun êffet sus ses verdicts, ou pouvez vos fier qu'il accordetha les prix consciencieusement ès siens qui les méthit-tont, chein qui d'ailleurs, a tréjous 'té la règlye parmi nos adjudicateurs, quoique i'y a souvent, parmi les auditeurs des gens qui crititchaient lus jugement et qui prétendaient saver mus qu'ieux.
Si ch'est gens-là entreprennaient la tâche, je vos asseûthe qu'i' n'trouvethaient pas l'affaithe aussi aîsie comme nou craithait bain.
Tout chu temps les siens qu'ont entré pour les difféthentes compétitions sont bain embarrassés à êtudier lus pièches et à pratitchi lus dialogues.
Par rapport à chennechin, i' s'arrivi un incident bain amusant l'aut'e sé siez Maît' Cliément d'Caen.
Sa nièche a entré pour le dialogue et l'homme qu'y prend part avec lyi va siez lyi de temps en temps pour le pratitchi, car ils ont touos les deux fait lus idée qu'y s'en vont gâgni le prumié prix.
Maît'e Cliém était hors à une assembliée d'pâraisse et les deux jeunes gens en profitithent pour lus perfectionner dans l'interprétation d'la pièche.
I' s'adonni que justement au moment qu'i' vinrent à la partie ouest que Miss Piton crie à tue-tête au pouore Dan Lêcaudey “Hors d'ichin à l'instant! Peûle qu'ous êtes! A insulter une femme qui n'a personne à la d'fendre!” la vieille Betsy Hachebéque passant dans la route et ouiyant des brèts terriblyes et saississant ches patholes-là, ou couothi tout dret siez Laiesse Ernon et l'êpouvanti par li dithe qu'i y avait tchiqu'un à assassiner Doris de Caen.
Mais comme homme de police, Laiesse avait san d'ver à accomplyi et prenant san bâton d'Justice i' s'en fut siez san vaisin suivi par la vieille Hachebéque qui voulait vaie de tch'est qui s'agissait mais qu'avait tout-d'même peux d'appréchi trop près.
Quand il entri dans l'gardin nos jeunes gens étaient à r'passer l'dialogue une deuxième feis et Laiesse oui Doris crier "Assez! Assez! ah mon doux! Allouos-en!"
Prenant san couothage à ses deux mains Laiesse voli par-de-dans et se rui sus Dan Lêcaudey le happi à la gorge en li présentant san bâton d'Justice souos l'nez.
Doris se mins à crier “Au meurtre! Au s'cours!” et étant une fille assez couothageuse se mins à tapper sus Laiesse avec un manche de bringe.
Le pouore Laiesse trouvant que ch'tait-là de bain drôles de morgaches de la part d'une fille à tchi qu'i' voulait sauver la vie, laissi couorre san prisonnyi et etant san r'gard de l'un à l'autre réalisi pour un moment qu'il avait affaithe à deux fôs.
I' falli acheteu des explications et quand la position fut bain êcliergie, ou pouvez bain penser qu'i' y en eut des Ha, bas!
Mais Dan Lêcaudey se frottait la gorge ouest que l'autre l'avait empoigni et Laiesse avait les êpaules doulantes par aver 'té maîllochi par la bringe à Doris, ch'est pourtchi ou fît la miyeu choses souos les circonstances.
Ou dêhalli un dicanteur et des verres et lus versi châtchun lus bouan stiffeur de la vieille couognac à Maît'e Cliém.
Tout est bain qui finit bain.
Caouain
1929
Viyiz étout: