* * *

Quant nous va à un grand dinèth et que chu dinèth est au Pavillon d'la Grève de Lecq iout que ch'est des platrées de tchi bon qu'nous sert, nous crairait qu'oprès aver mangi couomme quatre d'autre mangeaille nous voudrait vais au mains pouor une dizaine d'heuthes!

Et bein, ch'n'est pon d'même aves les siens qui pendant un temps étaient stuffés de bully-beef et d'macchoniquis!

Donc l'autre s'maine les vièrrs soudards d'là paraisse de St. Ou décidites d'avèr un buan fricot ensemble. Et oprès l'dinèth ieut chein qu'nous appelle un smoker. Quant vint l'temps de tchitter la Grève de Lecq, une djingue décidites d'monter dans le lorry à Syd et d'lus rendre en ville pouor un fricot de “chips” sièz Wall, à Snow Hill.

Arrivés à maintchi du mont, l'postman pensi qu'un miot d'musique f'rait plaisi et y d'mandi à Syd d'arrêter tandis qu'il irait ramasser s'n'accordéon.

D'pis que ch'tait des anciens soudards y fallait bein avèr une band de tchique sorte et nos gens attendites patiemment que l'postman fut ervenu de sièz ly avec sa musique.

Avec chutte accordéon nos gens lus réveillites et il y ieut des tchunes de touotes sortes de chantées.

Donc il tait quassiment deux heuthes du matin quand notre djingue arrive à Snow Hill et l'Sieur Wall était justement à couommencer de patchi pouor freumer sa boutique quant il vit arrive touote chutte squad d'affamés qui voulaient aves des “chips.”

N'v'la qui n'min pon d'buanne humeuthe la pouore hardelle qui avait à les servi et n'v'la qui s'comprend aisement, n'est-ce pon? Enfin y fallut bein qu'oulle fasse son travas et les platrées de “chips” furent vivement servies mais nos gars n'taient pon pressis.

Enfin tréjous est y qu'Edgar en fut pouor un whizz-bang auquel il n's'attendait pon car chutte hardelle n'tait pon d'l'humeuthe d'la Madelon qui riait ét ch'tait touot l'mâ qu'ou savait faithe, d'oprès la chanson, car chu whizz bang fut une cliamuse bein astitchie, à chein que j'ai oui dithe. Et couomme nous dit: Honni soit que mal y pense.

* * *

N'v'chein une histouèthe de cat qu'est la pure, plieine et entiéthe vérithèt.

Nous v'nait de douonner un jeune cat à une buanne femme qui habite avec sa fille dans... une rue iou qu'il y a des maisons couomme dans touotes les rues car après touot vous n'avez pas besoin d'en savèr pus long.

Donc chu biau cat était soigni couomme un esfant. Nous ly avait prépathé une bouaite... pouor qu'il couche dedans et n'ait pas fraid.

Ce jour là couomme fricot nos gens avaient acaté du paisson. Oprès l'avèr fait tchuire ils en mangites une partie et couomme nous savait que touos les cats aiment hardi l'paisson il y en ieut un miot d'mins de côté pouor Moussieu cat.

Mais chutte pouorre p'tite bête pouorrait p't'être bein s'faithe du mâ avec les arètes et ch'est d'antchi que la buanfemme et sa fille lus mites à éplucher les arètes d'vant de dounner chu fricot au cat, viyant que s'il en avait été autrement nous sait pon mais p't'être qu'une arète dans l'gosi du cat ly aurait été fatal et dans dithèt cas même l'milleur des Vets n'y pouorrait rein.

Donc oprès que Moussieu Cat eut ieut son dinèth, nous mins dans l'dresseur chein qui restait du paisson avec l'idée de l'mangi au thée.

Quand vint l'heuthe du thée, d'paisson il n'y avait pus dans l'dresseur que l'assiette. Couomment que chunna s'faisait d'pis qu'il n'tait v'nu personne dans la maison?

Et à force de cherchi, dans la bouaite au cat nous trouvi la coue du paisson, Moussieu ayant mangi l'restant arètes et touot! Etait-ce les arètes ou l'plaisi qui l'faisait ronronner?

Ch'est qu'notre buanne femme n'en était trop seux et au voleur oulle apportit bé vite une tchullée de lait!!

Marie Hibou
1929
 

Viyiz étout:

• Lé cat

• La Catte esfarouchie

• Ma Catte

• Mess Bisson et san ca!

• Dialogue entre Miss Nenné Caton et sa Vieille Catte

• Prêtro

• Prêtro

• Les Cats

• Aimes-tu la sardinne, valet?

• Deux cats lus en fûtent boutitchi

• Prêtro

• Les Rêves à Ronron