Les Pages Jèrriaises

Chein que vos raconti le Sieur Caouain dans la gazette de Samedi

Chein que vos raconti le Sieur Caouain dans la gazette de Samedi n'est pon la pure, pleine et entièthe vérithèt car y faut tréjous prendre avec un miot de sel les dires de chu triste oisé. J'en sais tchique chose mé qui prins pouor la vérithèt touotes les prominses que chu Caouain fit d'vant Moussieu l'Ministre quand j'eut l'malheur de l'prendre pour "better or worst" couomme disent les anglais.

Ch'est vrai que j'fumes touos les deux à Springfield pouor vaie l'Ebranlement d'Betsy mais ch'n'est pon vrai que j'avais apporté deustrais pots et une tchullyi dans un pagas pouor gratter les bords du bachin dans tchi qui faisaient l'nièrr beurre.

Oprès touot est che qu'nous va à une séthée avec un pagas quand nous a un miot d'avis et de respect.

Tchès qu'en aurait pensé Moussieu l'Gouverneu d'vais Marie Hibou couomme si oulle allait au marchi !

J'avons encouore un peu pus d'respect dans la famille des Caouains.

J'eumes du nièrr beurre mais ch'est Pierre Rondé ly même qui m'en bailli une potée et j'en fut bein aise car j'n'tais pon couomme Walter, le St. Pierrais de la Rocque, qui s'faisait qui n'voudrait pon en mangi viyant que Pierre Rondé avait écopi dans le bachin ! Et j'en ieut une potée touot couomme Moussieur le Gouverneur de Jerri.

L'boss était là èttout avec sa Missis et pouor vos montrer tchi drôle d'oiseau tchill est quand y ouï Betsey s'faithe qu'oulle le connaissait fort bein et qu'oulle s'écriyi : Oh! si je l'connais, l'pus laid objet et l'pus laid Moussieu qu'il y ait. Quand Betsey fit chutte r'merque j'criyais que l'boss s'n'aller monter sus l'stages pouor montrer que ch'tait autant de menteries. A ma grande surprinse au lieu de s'marri, le boss s'mint à rithe !

Si chunna avait été mé qui ly aurait servi dithèt compliement n'v'la qui aurait été une autre chanson pouor seur.

L'autre jour, criyant ly faithe plaisi et dans chès temps de Noué et de bieux présents n'v'la qui pouvait être utile, j'lis dit que j'avais ieut grand r'gret d'ouir les dithe de Betsey à l'entouor de ly la séthée de nièrr beurre à Springfield.

Savous chein qui m'répondit : Ma pouorre Marie j'sis chein que la nature m'a fait mais et té, t'es tu jamais ergardée dans un mireur !

Et y s'mint à ritonner. Tchi affronté. J'fut quassiment sus l'point d'ly répondre qu'en touot cas son nez était assez long pouor m'servi de jutcheux !

Sinon que j'n'voulais pon aver d'brit avec ly d'vant qui m'eut donné mon noué, ch'est chein que j'ly aurais répondu à chut affronté.

Acheteu que Noué est passé et que l'boss n'a même pas ieut la civilité de passer l'compliement je r'grette bein de n'pon ly aver dit chein que j'pensais de ly.

****

Y faut craithe que l'boss n'aime pon fort les pouommes car il n'emportu pon siez ly les siennes qui fûtes laissie à l'office pouor l'Sieur Caouain et sa famille.

J'en eûmes un tas et de tchi bé aussi pouor tchique temps j'aurons d'la gâche à pommes et des bourdelots, à la grande jouaie de touos les p'tits Caouain. Heureusement que chh'n'tait pon des pommes à cidre car l'Sieur Cahouain aurait p't'être voulu en faithe du pur jus et couomme il a tréjous la pépie pouor seur il n'y en aurait pon ieut pouor longtemps.

Es siens qui ieutes la complaisance de penser à nous, les pus grands remerciements de la famille Caouain.

J'espèthe que d'autes suivront chu buan exemple quand viendra la saison des patates car un fricot de patates nouvelles est de tchi qui fait tréjous plaisi.

****

Mes chiers lecteurs, ch'est la saison des compliements et des buans souhaits et mé j'sis d'avis de souhaiter touot malheur à ceux qui vivent de nos malheurs.

J'voudrais douonner un tas de travas à Moussieu Joe Balleine, le dénonciateur et à son parchionner pouor saisir touot chein qui appartient aux docteurs, aux vétérinaires et aux faiseurs d'enterrements et éttouot ès arracheurs de dents. Ch'est d'antchi j'vos souhaite de ne pas aver à faithe avec ieux l'année préchaine.

Si ch'est que vous avez affaithe dans Hill Street que ce soit pouor des assignations de rentes, pouor des contrats de bail à fin d'héritage mais pas pouor des remontrances ou des ordres de justice et encouore moins pouor les reconnaissances en justice.

Aux inspecteurs du Comité d'Agriculture j'souhaite la maladie du sommé pendant la saison des patates et des tomates.

Es marchands de sprayeurs rein à faithe avec la blue pierre.

J'souhaite éttouot la mort du rât d'otchupants et que les siens qui collectent pouor les assurances sus la vie aient à collecter touotes les s'maines sans oublier personne.

Et si touot ch'est malheurs que j'souhaite se réalisent ce sera pouor le bonheur que j'vos souhaite à touos.

Marie Hibou

31/12/1927
 

Viyiz étout:

 

Les Pages Jèrriaises