Les Pages Jèrriaises

Les blius et pourpres rotchièrs sont hors


Les blius et pourpres rotchièrs sont hors. Sus l'horizon
lé blianc embraîche lé bliu - j'sis bèrchi et bénîn;
la mé m'a r'bâptisi - lé viage est man pardon,
et l'baté m'a lavé dans l'êtcheunme et lé r'sîn.

M'n amour est eune mathée tchi r'mue - ava, amont.
Si j'aimais coumme la mé - n'y'éthait ni pliaintes ni teurs;
deux fais par jour j'veindrais embraîchi lé sablion,
et j'laîss'sais des vieillotes dé vrai - mes touffets d'flieurs.

Mais j'ai pâssé Nièrmont - Jèrri est liain achteu,
et n'y'étha pus dé lèvres, nitout dé drein baîsi;
et l'emeraude dé la mé a lavé man rouoge tchoeu,
né laîssant sus la grève qu'un pourpre et bliu rotchi.

 

Geraint Jennings
sus l'baté pouor St. Mâlo 9/10/2003


 

Viyiz étout:

 

Les Pages Jèrriaises