L'Assembliée d'Jèrriais
Rêunion mensuelle
D'vant c'menchi l's affaithes pour la rêunion mensuelle dé vendrédi. l'25 dé novembre, lé Président, l'Député A. C. Quérée, d'mandit ès membres dé lus l'ver eune minute en silence en mémouaithe d'eune membre décédée.
L's affaithes
Lé rapport dé la dreine rêunion fut liu et accepté, et trais nouvelles membres fûtent êlues. Parmi la correspondance qui fut liue auprès, i'y avait eune lettre dé bouans sou'aits, d'un membre au Canada.
Séthée d'tchestchions
La Dlle. F. Hacquoil, auve plusieurs danmes du Comité Exétchutif, avaient chouaisi des tchestchions, env'yées par les membres du Commité Exétchutif. Ches tchestchions futent distribuées ès p'tites groupes dé membres - au mains 110 'taient présents. I'y en avait dé sérieuses, dé politiques, d'amusantes, et toutes întérêssantes! Parmi les sujets - les rêunions mensuelles, des vièrs ermiédes, la Lot'tie, des patates Rouoyales, la vielle langue Jèrriaise, les longs g'veux des jannes, les danmes dans L's Etats, des vièrs ditons, etc., Un membre dé chaque groupe rêponnait pour touos 1's aut's. Ch'fut eune séthée difféthente, et qui donnait la chance à touos les membres qui voulaient, dé prendre part, et d'donner lus opinions sus bein des sujets. Tout à fait un succès!
Rafraîchiss'ments
Des rafraîchiss'ments futent servis auprès, par lé Conmité Dramatique, et l'Président lus offri des r'merciêments, aussi bein comme à la Dlle. Hacquoil et ses assistants, et sans doute au Connétablye W.P Le Marquand pour l'usage dé la salle acouo eune fais.
Annonces
Duthant la séthée, lé Président annoncit la prechaine rêunion pour jeudi, l'15 dé decembre, dans la Salle Publyique dé St. Martîn, quand l'Conmité Dramatique est à arrangi un concert en Jèrriais par des artistes dé l'Eisteddfod. Lé diner annuel est arrangi pour lé 26 d'janvyl à La Pomme d'Or et comme est la couôtunme, les membres qu'ont bouanne idée d'yaller sont avertis d'payer lus souscriptions d'vant la fin d'l'année, si n'l'ont pas dêjà fait.
Viyiz étout: