Les Pages Jèrriaises

 

 

Vîngt tchestchions

 

L'Assembliée d'Jèrriais

 

Auprès d'l'orage et eune averse dé plyie l'arlevée du 26 d'août, ch'fut împossiblye d'aver la rêunion mensuelle en pliein air siez l'Sieur l'Mâsuthi comme avait 'té arrangi. Au lieu, les gens lus rêunitent à la Salle Publique dé St. Martin.

Duthant l'couothant d's affaithes, qui, futent courtes, lé rapport du mais d'juillet fut liu et accepté, deux nouvieaux membres futent acceptés et un vote dé r'merciements fut proposé au Connêtablye Ahier pour nos aver permîns d'faithe servi la salle.

Lé restant d'la séthée 'tait dans les mains des danmes du Conmité Exétchutif, et tout allit magnifique.

Vîngt tchestchions


J'c'menchînmes avec la gamme dé “Vîngt tchestchions”, les hommes d'un côté d'la salle et les femmes dé l'autre. Ch'fut hardi amusant à entendre les tchestchions et les deux côtés s'en dêhalîtent bein - les femmes ayant l'pliaisi d'gagni!

Lé fricot


Chenna fut suivit par un vrai fricot dé gâches à fouée, des saussiches et d's ouonions fricachis, et du café. Ch'tait raide bouan et les membres lus en régalitent!

Du rêvillon


Pour fini la séthée i'y avait d'la musique et des chansons par plusieurs des membres. I'y avait eune soixantaine dé personnes, et tous 'taient d'accord qué ch'avait 'té eune raide bouanne séthée.

Lé Président ermercyit, touos les siens qu'avaient aidgi sus autchun sens pour faithe eune si bouanne séthée, et annoncit la rêunion annuelle générale pour vendrédi, l'30 dé septembre, dans la Salle d'Agritchultuthe, St. Hélyi à 8 heuthes lé sé.

 

EP 13/9/1960
 

 

Viyiz étout:

 

 

Les Pages Jèrriaises