Les Pages Jèrriaises

Poésie sur quatre fleurs
Lily, snowdrop, Forget-me-not et Violette


Avous entendu et ouï-paslé
De chein qui vein de s'passé
Au k'menchement de l'aoutre s'maine
Qu'à fait à tchicûn bein d'la peine.
I' pathaît qui y-a un certain Pappy,
Qui n'est pas tout chu temps bein fi
Et qui faout pas prendre à r'bour pé,
Ou i' s'chergétha de vous settlé
Et bein! sa fille a bétôt un galant,
Chouna l'i fait d'la peine tout chu temps,
Ou l'est extrémement dèshallée
Pour ses'djix et tchiques années,
Et, pour yi et san galant,
Il' lus trouve bein charmant,
Car ou savèz ches daeux belles flieurs
Qui lus entre'touche près du tchoeu(r)!
Unne Lily et un Snow...drop
Aiment hardi la Forget-me-Not.

I' sont jeunes touos les deux,
Et i' peuvent faithe, bein saeux,
A la musique, i' sont capabbles,
Mais Pappy n'est pas agréabble,
D'pis qu'il allit, l'aôutre Mardi au sé,
Dans du temps comme i' venté,
Vèthe, Pappy à la pratique fut,
Et y'en eut iun qui fut dèchut,
Parceque Pappy êprouvi à mettre arrêt
A touos lus beaux apprêts;
En èsprouvant à d'êteindre les lampes,
Qui êcliéthaient touos les chantres!

Nou l'i dit qui té maître sièz li,
Et qui pouvait pas les empêchi,
D'pis qu'il' avaient d'amandé au Secrétaithe et Trésori
D'lus donner permission à pratitchi,
I' faisaient tous d'lus mus,
N'pouvant pas en faithe pus.
J'vos garantis que nos jeunes gens,
Peuvent bein nous chanté de biaux chants,
Quand il' ont fait touos lus d'vé,
Il' lus en r'veinnent châtchun sièz sé,
Mais i' faout vos dithe la véthité,
Que Pappy en est bein gêné,
Car i' pensehardi ès jeunes gens
Qu'aime être bras d'sus bras d'sous en r'venant.

Lé lend'main il allit en ville,
Parcequ'il avait hardi à dithe
A un grand mousieu wesleyain,
Qui fait chein qui peut pour le bein.
Hélas! tch'est qu'Auntie s'en va dithe
D'vais chein que j'vein d'êcrithe.
Nou la verra avec san pagni à nouvelles
A paslé ès gens de toutes les affaithes,
Cat i' pathaît qu'ou la dit,
Man n'veu et ma nièche éthont tout plien d'chi.
I' pouorront lus proum'né touos les jours
En motor-car par les belles routes,
Mais un couôsin à sa nièche
Le mettra bein vite à sa pièche.

Pappy, Mammy et Auntie
Peuvent allé lus couochi,
En pensant ch'est inutile,
Car quand nou z-a unne jeune fille,
Ch'est tout la mode des jeunes gens,
D'les vais lus prom'né avec un galant.
Ne vla qui fait des changements,
Pour unne fille et pour ses gens,
Quand veint l'biau printemps
I' n'faout pon perdre de temps;
Ch'est la saison à plianté
Quand les z-ouaîsiaux sont à lus l'vé,
Dans l'gardin une Violette,
Au biau p'tit chant de l'allouette,
Car ch'est tout à fait bein pensé
Pour faithe un biau p'tit touffé!

Je crai que les daeux belles flieurs
N'en chageront pas de couleur,
Lus décision est bein arrêtèe;
I' n'en chang'ront pas d'idèe.
Je d'mande à Pappy de s'contenté
Pour l'honneur d'avé unne fille à mathié.
En lus souhaitant à tous une bouanne santé
Et d'oublié tout chein qui s'est pâssé,
Car m'n'idèe pour l'entente cordiale,
Et que les siens qui lus ent'e veulent lus ent'e vallent.

Il est grand temps que j'finisse,
Car j'k'menche avé fraid es pis.
J'm'en vais bétôt m'couochi
Dans la niche de man vièr cliochi.
Si Pappy s'en ithait à la chasse
Et qui verrait ma vieille carcasse,
I' s'rait pas longtemps à m'mithé
Pour tâchi de m'faithe trembiai.
I' y a longtemps qui n'a pas tithé un trai,
D'maîme, j'ai unne chance de n'être pas plieumé,
Car quand nou z-est solide et bein saeux,
Nou n'est pas longtemps à faithe un Bull Eye.

A Bétôt.

Cahouain

 

Viyiz étout:

 

Les Pages Jèrriaises