Touos les cheins tchi sont souos l'fardé d'l'escliavage dévthaient considéther lus maît's dîngnes dé tout respé à seule fîn qu'lé nom du Bouôn Dgieu et not' ensîngnage né saient pon êcliandrés. Les cheins tch'ont des maît's tchi craient n'dévthaient pon les sgorner raîque par cause qu'i' sont des parchonnièrs d'la fouai. Au run, i' dévthaient les sèrvi même mus par cause qué lus maît's lus sont chièrs coumme des parchonnièrs dans la fouai et sont dêvoués au bein-êt' dé lus escliaves.
Ches'-chîn sont les choses qué tu'éthas à ensîngni et însister sus. Si autchun ensîngne autrément et n's'accorde pon auve la bouonne înstruction d'not' Seigneu Jésû Chri et auve l'divîn ensîngnage, ch'est des têtouongnes et i' n'comprannent rein. I' sont mauvaisement întérêssis dans d'l'ardgut'tie et du hèrtchîn entouor des patholes tchi mènent à la jalousie, au brit, à l'êcliandre, ès malinnes doutanches et d'l'èrse tréjous entre des gens d'esprit corrompu, à tchi la véthité a 'té volé et tchi craient qu'la dêvouêthie est un mouoyen d's'enrichi. Mais la dêvouêthie auve lé contentement est un grand gân. Ch'est en tchi j'n'avons rein apporté dans l'monde et jé n'pouvons rein en emporter. Mais si j'avons du mangi et d's habits, j'nos content'tons dé chenna.
Les cheins tchi veulent dév'nîn riches tchaient dans la tentâtion et l'piège et dans bein des d'sièrs niaûmîns et niêsibl'yes tchi trébuquent des gens à la ruinne et la destruction.
Ch'est en tchi l'amour des sou est la réchinne dé toute sorte d'ma. Y'a des gens, ag'neurs dé sou, tchi lus sont êdgéthés hors d'la fouai et lus sont pèrchis auve bein des douleurs.
Mais té, houmme du Bouôn Dgieu, tu t'cârre dé tout chennechîn, et vais souotre la justice, la dêvouêthie, la fouai, l'amour, l'enduthanche et la douocheu. Combats l'bouôn combat d'la fouai. Gaffe la vie êtèrnelle à tchi qu'tu fus app'lé quand tu t'confêssis bouonnement dans la présence dé hardi d'têmouains. L'avant à la veue du Bouôn Dgieu, tchi donne la vie à tout, et d'Jésû Chri, tchi en têmouongnant l'avant à Ponce Pilate fit la bouonne confêssion, j'té chèrge dé garder chutte quémande sans tâque ni bliaûme jusqu'à l'appathition d'not' Seigneu Jésû Chri, qué l'Bouôn Dgieu accomplyitha dans san temps à li - Dgieu, l'bénit et l'seul gouvèrneux, lé rouai des rouais et l'seigneu des seigneurs, tchi seul est înmorté et tchi d'meuthe dans la leunmiéthe înnaccessibl'ye et qu'fis d'âme n'a veu ni n'peut vaie. À li sait l'honneu et la piêssance à tout janmais. Âmen.
Di ès cheins tch'ont des sou et un magl'ye dé bein dans chutte vie dé n'faithe pon des teurs, dé n'sé fier pon ès risquéthies des richesses mais au Bouôn Dgieu tchi nos heune dé tout chein qu'i' nos faut; et d'faithe du bein, dé s'enrichi par d's actions charitabl'yes, d'êt' libre auve lus sou et mannigats pouor chârer; qu'i' lus graient eune trésôr'rie seûthetabl'ye pouor lé temps à v'nîn, à seule fîn d'lus asseûther la vraie vie.
Viyiz étout: