Lé Preunmié Livre des Chroniques, Chapitre 10
Vèrsets 1-6
Achteu les Philistîns lus battaient contre Israël, et l'hoummes d'Israël happîdrent la pathe l'avant ès Philistîns, et fûdrent gav'lés, bliêssés à mort sus l'Mont Dgilboa. Et les Philistîns cachîdrent souotre Saûl et ses fis, et tuîdrent Jonathan et Abinadab et Malchi-shua, les fis d'Saûl. Et la batâle allait ma pouor Saûl, et i' fut achîtré par l's arbalêtchièrs, et ches arbalêtchièrs l'adèrchîdrent. Épis Saûl dit à san porteux d'armes, "Hale tan sâbre et sâbre-mé d'vant qu'ches hoummes tchi n'sont pon circoncis veinge mé vengi!"
Mais san porteux d'armes 'tait bein êffrité et n'voulait pon l'faithe. Épis Saûl halit san sâbre et s'sâbrit auvec. Et quand san porteux d'armes vit qu'Saûl 'tait mort, il en fit d'même et mouothit. Né v'là coumme tchi qu'i' pâssîdrent lé pas, Saûle et ses trais fis; et toute sa fanmil'ye fut péthînmée ensembl'ye.
Vèrsets 8-12
L'matîn, quand les Philistîns vîndrent pouor dêpouoilli les morts, i' trouvîdrent Saûl et ses fis achouêmis sus l'Mont Dgilboa. I' l'dêpouoillîdrent et prîndrent sa tête et sa cotte d'armes et env'yîdrent des m'sagièrs partout l'pays ès Philistîns pouor pâsser la bouonne nouvelle à lus idoles et au peupl'ye. I' mîndrent sa cotte d'armes dans l'templ'ye à lus dgieux, et bâtonnîdrent sa tête dans l'templ'ye à Dagon. Mais quand touos les cheins d'Jabés d'Galaad ouîdrent tout chein qu'les Philistîns avaient fait à Saûl, les dgèrrièrs lus en fûdrent emporter l'cadâvre à Saûl et les cadâvres à ses fis, et l's emportîdrent à Jabés, et l's entèrrîdrent souos l'tchêne à Jabés, et jeûnîdrent eune septaine.
Vèrsets 13-14
Saûl mouothit don par cause du péché qu'i' fit contre lé Seigneu; ch'est en tchi i' n'gardait pon la pathole du Seigneu, et i' s'en fut s'entchêter auprès d'un tchéthaûd au run dé d'mander au Seigneu, et pouor chenna i' l'fit mouothi et baillit l'rouoyaume à Dâvi fis Isaï.
Viyiz étout: