I' fut proposé qué j'prînssions part dans l'Festival Gastronomique, et j'dêcidînmes dé prépather eune stâlle pouor la Fête d'la Mé à Gouôrray, Sanm'di lé treize dé Mai, 2000.
I' n'taient pon pôssibl'ye dé coutchi autcheune chose - j'sommes întérêssis dans la langue, pas dans la tchuîsinne! Y'éthait bein des stâlles là-bas en tout cas à vendre à mangi et à béthe. J'dêcidînmes dé faithe des p'tits fieillets d'èrchettes à vendre pouor tchiques pénîns et d'exhiber tchiques photos et explyicâtions entouor les traditions gastronomiques dé Jèrri et lus vocabulaithe.
J'avions d's èrchettes pouor les mèrvelles, bein seu, et les fliottes et les crêpes Jèrriaises, et viyant qué ch'tait eune Fête d'la Mé, pouor la soupe d'andgulle.
J'prépathînmes des fieillets d'vocabulaithe à vendre étout - les noms des paîssons en Jèrriais et en Angliais et les frits et les lédgeunmes.
Sus not' stâlle, j'exhibînmes d'la batt'tie d'tchuîsinne: eune tchulyi, un couté, eune fourchette, un sâsse-paine, eune câssetrole, un mogue, eune bolle, eune dréch'rêsse, eune coul'rêsse - touos l's objets auve un titchet auve les mots Jèrriais êcrits sus. Les vîsiteurs Français 'taient bein amûthés à compather l'Jèrriais auve lé Français ou l'Nouormand - et y'avait un tas d'monde tchi sé d'mandait coumme tchi dithe coul'rêsse en Français.
J'avions à vendre étout des livres et cassettes: Bouon Appétit, La Tchuîsinne Jèrriaise, Lé Jèrriais pour tous, Jersey Norman French is Fun - et d'vièrs la fîn d'l'arlévée not' bolle 'tait tout plieine d'sou.
Hardi d'monde voulait s'arrêter pouor bagouler un mio - d's anmîns, des vîsiteurs, et des gens tchi voulaient saver tchiquechose entouot lé Jèrriais.
Ché n'fut pon qu'lé travas. Not' stâlle 'tait en fache d'la stâlle des hîtres et d'champangne, y'avait la vainne des mèrvelles un mio pus liain l'long d'la caûchie, et y'avait des musiciens et d's artistes dé rue.
I' n'faisait pon trop caud - y'avait d'la bliâse, mais ch'tait bein pliaîsant sus la caûchie. L'avion des gâzettes n'put pon v'nîn à tèrre à cause d'la bliâse et don jé n'pouvions pon liéthe l'articl'ye dans la "Daily Telegraph" tchi mentionnit l'festival et l'Jèrriais et r'publyit deux ditons prîns dé dans lé programme du festival.
J'crai qué ch'fut un grand succès pouor la Section.