A Jêrry
|
Oprès bien d's-àns je r'viens vée aurapreume, Joli Jerry, c'm-ê'qu'tu r'vire et déreume Tout chu qu'aut'fais charmait nos grànds papas, Et qu'à persent tu-aïme à dérâcllaïr bas. Vlà ten ch'min d'fer - je n'serais qu'je n'l'admire, Que j'l'aime étou j'ai r'gret qu'je n'peux pouit l'dire: Tu vas sé'noeuds dans le ch'min du progrès; Et bien, tànt mûx, s'tu-ès bien certain qu'ch'en est. Pour quànt à mé, sans tro'gênaïr d'la mode, Sàns trouvaïr faute à ses niaistaïs j'm'acc'mode: Pourtànt tandis que j'pourrai cràmpoussaïr, S'pllaît au bouan Guiu, sus mes pîds j'veur allaïr. Pour tout chunna qu'un chacun qui préfère Ch'vaux ou ch'min d'fer à ses daeux pîds d'derrière, Faisshe à sen goût, coum l'autre qui baisait Sa vaque aut'fais, à Guiu seit-i, disait. Ah! chest qui s'ront bientôt tes vertes rues Où l'rimeux aïme à lière au fond des nues, Gav'laï sus l'dos, ou bien tout entouar d'li D'la grand' Nature à d'vinaïr tout l'biau d'vis. Bientôt, ma fé, nou n'ôra qu'tes machines, Et leux sufflets, où sus l'haut d's-aubépines, Chântaient brâment tes voliers d'chiers mouissons, Mais qu'tout l'camas et l'meutin banniront. Eh bien n'y-a-compte, ichin bas faut qu'tout change; Ch'est l'sièclle d'fer, que l'vier prophète et s'n-ànge Avaient prédit - pourvé qu'nos coeurs étou N'saient pouit faits d'fer, che n's'ra qu'mié ma', mon Dou! Salut, chière île, où jadis j'passais l's-heures L'long d'tes fossaïs, tous farcis d'flleurs et d'meures, A pourmenaïr, jaune et vert comme tes chaoux, Dernette av'nante, ah! que j'y-ai pensaï d'caoups. Mais bran d'chunna, ch'n'est là que l'cours du monde; Châcun va, vient, ichin bas fait sa ronde; Est naï, vit, meurt, et - l'bouan Guiu seit pour nou! D'not'grànd savouair v'là quâsiment l'biau tout. Mais, O Jêrry, si quiq vier grànd-grànd père Allait r'venir, sès iers i'n'pourrait craire; Tes nouviautaïs n's'raient miette en tout d'sen goût, Car i't'verrait net, r'viraï cha-tchu-d'sous. Vlà ta p'tit' soeur qui troublle pour te sière, Adret déguâie à n'restaïr pouit d'l'arrière: Marchi, ch'min d'fer, et cauchie a'l's'éra - Achu qu'a'dit - païr à té, s'a n't'y bat. Au pus failli faut la pus grosse m'loque; Le p'tit pourché la pus grànd panais croque; Et tu-iras raide étou, j'peux t'l'asseuraïr, Not' maufait d'Guernesi pour déroutaïr. Cache en avànt si ch'est bien là t'n-idée; Vit et prospère ossi lien qui t'agrée: Pour mé, lâquànt l'vier couain d'âtre où je roui, J'aime à v'ni' d'vée ossi fier et rêjouit. DC St.-Hélier, Avoût 14e, 1872 |