Voul'-ous êtr' fameux? L'artiste améthitchain Andy Warhol dit i'y a tchiques années que tout l'monde pourraient être fameux pour tchînze minutes dans sa vie, grâce à la télévision, mais j'nos d'mandons aniet si ch'est possibl'ye dé rester fameux auprès sa mort. P'têtre qué ch'n'est pon trop difficile, si nous est soudard duthant les temps de dgerre, artiste, înventeu ou politicien, seigneur ou rouai, mais pour les gens ordinaithes...? Eh bein, si j'faisons tchiquechose dé drô, d'extraordinaithe ou tchi n'est pon raisonnabl'ye, nou peut trouvé san nom preservé pour des généthâtions dans nos ditons.
Par exampl'ye, nou peut dithe d'un homme êtrange, qu'il est comme Jean d'la Cotte, tout seu d'sa sorte, et d'un autre tch'est tréjous embarassée, qu'il r'sembl'ye à Tom Hérault, qui fut d'nonciateu deux jours et eune niet. Si un homme rit trop, nou dit qu'il est bête comme l'âne à Jean Venement, tchi rit d'sa sottise - ou bête comme Jean Badier du Dicq, qui faisait des crépes au dgiabl'ye. Au jour d'aniet, i'y a bein des gens qui travaillent pour lus-même, mais l'temps passé, ch'tait pus rare; ch'est pourtchi les gens ditent d'un 'té homme, qu'i 'tait sus san compte comme les cats à Maitre Jean Gouoray. En pâlant des animaux, nou dithait étout qué l'sien qu'aime Bertran, aime san tchian.
Ch'est dammage qu'auprès avé gardé l'memouaithe de touos ches gens pour des chents ans, au jour d'aniet les v'là qui s'dêteindre comme l'usage d'la langue jèrriaise. J'pourrons-t'i' trouvé pus des détails des vies de ches gens-là? Peut-êtr' - mais j'sommes comme l'Saint Thomas, j'nos en doutons!
Viyiz étout: