Nation contre nation, autr' fais sé lève,
La haine dans l'homme, tout l'temps grandit,
À ch't heu nos manque les nécessaithes,
Par cause dé fraude et pièrcheûsie,
Et l'homme fache l'avenîn sans veue cliaithe,
N'na par la forche ou confus en menn'tie's,

Mais l'jour veindra et est bein prês,
Quand dé nouvé l'homme r'trouvtha san Sauveur,
Et sa vie r'prendra eune nouvelle jouaie:
Jouaie d'rendre sèrvice à son Créateur,
Car l'homme vivra seulement pour la paix,
S'mithant dans la bonté, et rendant l'bonheur.

Chu bieau jour, quand l'homme dans san bonheur,
Rendra l'bein pour lé ma et en s'ra heûtheux,
Vèrra, dans ses fréthes et soeurs
Lé bein seulement, et pas d'ma en ieux,
Comme la sèrcl'ye qu'est êclipsée par la belle flieur,
Et la niet par lé solé, bein seux.

Grand Créateur, à Té j'appartenons,
Chu bieaux monde, Tu nos à prêté,
Pour modellé sus tout chein qu'i' y'a d'bouon,
Notr' vie accordant à Ta volanté,
J'sommes tous Tes êfants, sans tchestchion,
Tout chein q'Tu nos d'mande, ch'est d'l'accepter.

J. J. Le Marquand.