Eune belle arlevée d'octobre, lé bouonhomme George, appliét sus san bâton, 'tait à faithe sa p'tite touônnée lé long du c'mîn qu' allait des clios jusqu' au vièr moulîn et puisqu'i' faisait si bé et qu' i' 'tait bein enbonnetée, il avait marchi pus liain qu' d' habitude. I' ouiait un miot haut, mais ch'est qu' i' viyait bein cliai et il s'apèrchut qué les brousses à la carre du clios craîssaient pus hautes et i' s'mint à fourgoter avec san bâton parmi les ronches et l'vèrjus au dgiabl'ye. Surprînt, i' vit qu'il avait trouvé eune vielle rouelle dé hèrnais; lé cèrcl'ye tout mangi par lé roui, les gantes et les rais pouôrris et vèrmoullus par la plyie et les p'tites bêtes. Mais, lé moué au centre, sans doute fait en bouais pus du qué l'restant, montrait acouo des p'tites tacques dé rouoge peintuthe et i' n'tait pas si pouôrri. Lé bouonhomme sé mînt à digoter et i' fut bein ravi qué la heuche et la rindelle 'taient acouo en pliaiche et qu'eune demié-douzaine dé colînmachons 'taient endormis là pouor l'hivé!
I' sé l'vit et pensit à li-même: 'Ch'est-i eune ruelle dé haut hèrnais ou ieune dé d'mié-bas?' S'i' pouorrait trouver l'êsseu! Ravigotté par sa trouvâle, i' s'èrmint à fourgoter et à digoter pus liain et à sa jouaie, dans mains dé deux minnutes, il avait trouvé un êsseu pas tout drait et i' savait qué la ruelle 'tait, sans doute, pouor un d'mié-bas! Tout content, i' r'touônnit pouor siez-li. I' s'r'appelait bein qu' i' soulait tchéthier les raves et tchiquefais les navets avec lus freûles, et quand lé clios 'tait apliat, i' m'ttait des hauches sus l'hèrnais pouor pouver en chèrgi un mio d'pus. Mais, quand i' y avait eune pente et qué la brecque sé trouvait du but d'haut, i' n'en m'ttait qué pliein l'banné.
Tchi trouvâle! Pouôrre vielle rouelle - qué tu pouorrais nos dithe des belles histouaithes!!
JT
Viyiz étout: