Un bouon garçon St.-Martinais
Pus mauvais qu'niais,
Un Dimanche à l'Egllise,
Haoutait,
Ronfllait;
(Est-che êtounant que nou-s-en d'vise)
Et dormait coume un beinheureux,
Rêvant de ses quérues, d'ses boeux.
Enfin! bétôt, i s'rêvillit,
Et ouiant chanter, s'êcriit
Au mitan du cantique:
"Eh' qu'estq'nou chante par illo?"
Iun d'ses vêisins assis près d'li
Li r'pllique,
Voulant aveir un p'tit miot d'gi,
Et sachant bein quand douner l'mot:
"Ah! chaqu'un chante chein qui sait."
Notre dormeux presque endormi,
Le ouait,
Li baille un miot de sa varvette,
Et c'menche à braire au pllein d'la vouèx:
"Passez le bois, brunette!
Passez le bois, passez."