I' s'adonnit qu'duthant l'règne dé Xèrxès, (chu Xèrxès-là 'tait l'rouai d'chent vîngt-sept tchilliettes du rouoyaume, d'l'Înde jusqu'à l'Êtchiopie), à chu temps-là dans la traîsième année d'san règne, quand i' 'tait à règner d'Chuchan' sa fortérêsse, i' baillit un fricot à touos ses captaines et sèrveurs, et ès cap'taines d'l'armée d'Pèrse et d'Médgie, ès grands hoummes et ès gouvèrneurs des tchilliettes d'san rouoyaume tchi 'taient là l'avant à li. Et pouor bein longtemps, véthe, jusqu'à chent huiptante jours, i' les laîssit vaie toute la richesse et la glouaithe dé san rouoyaume et l'grand pouvé et l'hounneu tchi 'taient à li. Et au jour tèrmie, l'rouai baillit un fricot à touos les cheins tchi 'taient à Chuchan', ville au rouai, ès p'tits coumme ès grands, pouor sept jours, dans l'bel dé d'houors du gardîn du palais du rouai. Y'avait des ridgieaux en blianc et vèrt et bliu, sus des pourpres êtentes auve l'miyeu lîn, amathés à d's ièrs en argent fitchis dans des pilièrs d'pièrre polie. Les tchaîses 'taient en or et en argent sus un plianchais d'rouoge et blianche et jaune et néthe pièrre. Et nou lus sèrvit à baithe dans des vaîssieaux d'or, châque vaîsse 'tait difféthent, du vîn du rouoyaume, bailli librément par l'rouai. Et nou b'vait s'lon la louai; fis d'âme n'en 'tait oblyigi: ch'est en tchi l'rouai avait c'mandé à touos les grands sèrveurs d'san palais d'faithe à châtchun s'lon san pliaîsi. Et Vachti, la reine, baillit un fricot ès femmes du palais du Rouai Xèrxès.
Épis les sèrveurs du rouai tchi 'taient d'sa siette dîdrent, "Qu'nou-s'âge qu'si des belles jannes hardelles pouor l'rouai."
Viyiz étout: