J'sommes v'nus ensembl'ye comme la fanmil'ye dé Dgieu dans la présence dé not' Pethe pour lî offri nos louanges et nos èrmèrciements, pour êcouter et èr'chéver sa Pathole, pour lî donner les bésoins du monde, pour lî d'mander pardon pour nos péchés, pour chèrchi sa grâce et par san Fis Jésû-Christ dé nos offri à san sèrvice."
Prions Dgieu
Dgieu êtèrnel, j'voulons t'èrmèrcier pour l'opporteunité qué j'avons pour v'nîn ensembl'ye aniet pour êcouter ta pathole d'la Sainte Bibl'ye, pour chanter tes louanges et pour prier. Êclyaithis pour châtchun d'nous lé vrai message dé l'Êvangile que j'piêssons comprendre la raîthon qué Dgieu d'vînt humain, connît toutes nos souffranches et nos jouaies, mouothit sus eune crouaix et pis fut èrsuscité pour vivre êtèrnellement comme Sauveu et Seigneu afîn qué tous tchi craient en li piêssent vivre victorieusement comme li. Par tan Saint Esprit, asseûthe-nous que j'pouvons vivre dans ta présence chaque jour et té glorifier dans nos vies, par lé nom dé Jésû-Christ not' Seigneu. Amen.
J'prions pour tous tchi sont en troubl'ye aniet. J' te d'mandons pour ta grâce sus les cheins que j'connaissons tchi sont malades siez ieux ou en hôpita - sus les mil et mil réfugies tchi sont sans mangi, sans habits, sans d'meuthe, et dans bein des cas tch'ont pèrdu les membres de lus fanmil'ye - donne-lus confort et couothage et qué les cheins tchi sont là pour lus aidgi aient la compâssion de Jésû-Christ. Et où-est qui y'a terrorisme et dgèrre, partitchulièthement à l'Afghanistan et en Israël, amène ta paix, où'est qui y'a haine tan amour, où'est qui y'a m'sespé tan espé Seigneu, Prînce dé la Paix. Amen.
J'voulons prier étout pour tous tch'ont la responsabilité dé gouvèrner - not' Duc, la Reine Elizabeth dans la chînquantième année dé san règne: pour not' Gouvèrneux et l"Bailli, les membres des Êtats et d'la Cour qu'il' aient tous la capacité dé m'ner l's affaithes auve sagesse et d'être un exempl'ye au peupl'ye en toutes choses. Et j'prions étout pour chutte églyise - pour lé Recteu, les Officièrs et les membres dé la congrégâtion qué tous s'saient bouons témoins à la fouai chrétchienne.
J'offrons toutes nos priéthes dans l'nom béni dé Jésû-Christ not' Sauveu et not' Seigneu. Amen.
Dgieu tout-puissant, j' t'èrmèrcions pour tan exempl'ye en donnant tan Fis unnique et j' t'èrmèrcions pour nos aver apprîns à donner dé not' bein.
Bénis, j' t'prions, ches sou donnés pour l'avanchement dé tan rouoyaume sus la tèrre et ès cheins tch'ont la responsabilité dé dêpenser ches sou, donne-lus ta sagesse et ta direction à la glouaithe dé tan Saint Nom Etémel. Amen.
Qué la grâce dé not' Seigneu Jésû-Christ, l'amour de Dgieu et la commeunicâtion du Saint Esprit s'saient auve nous et qué châtchun d'nous connaîsse la paix dé Dgieu tchi surpasse toute not' compréhension aniet, d'main et à tout janmais. Amen.
Viyiz étout: