De bouan matin je m'révillyi,
Et vite ma chandelle j'allumi,
Je sauti hors dé' dans man liêt.
Et j'vi que l'bouan homme dans la nièt,
M'avait apporté des présents,
D's oranges, des gâches et d'biaux ribans.

Mais chein qui m'fit la pus grande jouaie,
Ch'tait une poupette en robe de souaie,
Qui me r'gardait toute étonnée!
Dé' dans la cauche à ma m'mée.
Quand j'la prins dans mes bras bain vite,
Ou s'mins à rithe, la chiéthe p'tite!

Ch'est mé qui la couoche touos les siers,
Bain confortablye dans san p'tit ber,
Ou m'laisse tréjous la d'shabillyi,
Et quand j'mets sa téte sus s'n ouothillyi,
S'endort toute d'suîte sans s'mettre à braîthe;
Ch'n'est pas d'même avec man p'tit frèthe!

J'voudrais bain l'emmener à l'êcole,
Mais j'ai trop peux que nou m'la vole,
J'la laisse sièz nous, ch'la vaut bain mus,
Et ma memmée ergarde d'sus,
Mais quand je sis r'venue au sé,
N'y a pas personne qu'y touche que mé.

Nos gens tchiquefais me font grand peux,
I' m'disent que dans un an ou deux,
Faudra qu'j'la donne à ma p'tite soeu!
Mais ch'n'est pas vrai! Ch'la m'rompethai l'tcheu,
J'veurs bain li donner toutes mes jouettes,
Mais faut qu'ou m'laisse ma p'tite poupette!

G. W. de C.