Moussieu l'Editeu,
“Ecoute, Ph'lip,” la Merrienne se fit, hier au sé, “est-che vrai qu'y'a des milles de chais docqueurs en Angliétêrre tch'y r'fusent de chérgi des batiaux?”
“A chein qu'les papiers disent,” j'l'y raiponnit, “à chu moment y'en a dans les quarante mille à rain n'faithe, et y'a étout des chents batiaux dans l'même cas. La situation d'veint pûs sérieuse d'un jour à l'autre.”
“Mais pourtchi chonna?” ou d'mandit. “Tchi raison tch'il ont chais docqueurs pour lûs action? Ch'est lûs fichues unions, bein seux. J'ai tréjous dit, et je l'dis ocquo qu'les unions sont la ruine du pays.”
“Nouffé, pas chutte fais, Merrienne,” j'l'y dit, car la piûpart de chais balloques-là, tch'y n'veulent pas travaillyi ont agi contre l'avis d'lûs unions. Ch'est tout sîmpliément tch'y sont bêtes assez d'êcouté d'chais Communists, comme un troupé d'brebis. Et pourtant nous avait tréjous creu que l's'Angliais avaient un mio d'bouônsens.”
“Si ch'est d'même,” ou dit, “y'a qu'une chose à faithe. Ch'est d'plianté une douzaine ou d'même de chais peûles contre une muthaille et d'lûs baillyi un trait-d'arme, pour encouathi l'restant.”
“N'y'a pas d'doute, ma vieille,” j'l'y dit, “qu'en Russie ils attrap'thaient chutte méd'cine-là, mais en Angliétèrre v'la tchi n'peut pas s'faithe, malheutheusement. Ch'est grand dommage.”
“Vèthe,” ou dit, “mais sais-tu bein, Ph'lip, qu'à matin, en fricashant l's'oeux, une idée m'est v'nue dans la tête. Si touos chais hommes préfèthent d'être à rain n'faithe, pourtchi qu'lûs femmes ne font pas la même chose?
“As-tu jamais pensé,” ou continuit, “que tu t'trouv'thais dans un drôle de pité si, tchique biau matin je m'dîsais : 'Fiche du travas, j'm'en vais en strike?'"
J'm'êgouffit à rithe. “Ma pouore Merrienne,” j'l'y dit, “absolûment tu perds la tête. Si tu tais folle assez d'faithe chutte bêtise-là, tchèsqu'y f'thait tan travas?”
La raiponse vint tout-d'suite. “Ou bein tu le f'thais, man Ph'lip, ou y ne s'sais pas fait. Tu s'sas p't'être surprint d'savé que ch'n'est pas la preumié fais que j'y'ai pensé, et tréjous après les shows. Touos l's'ans pour à-bein-près tchinze jours tu fiche tan camp d'bouon matin, et tu r'veins à l'heuthe tchi t'pliait. Tchèsque-a fait l'travas tandis qu't'as tait hors tout l'jour? Et tchèsque tu'éthais dit si n'y'avait pas yeu un bouon r'pas prêt à mettre sûs la tablye? Tu'éthais tout-d'suite voulu savé tchèsque chonna voulait dithe, et tu te s'sais boudé pour le restant d'la séthée. Oh, si tu savais combain d'fais qu'tu as tait près d'avé la cast'role à la tête! Et n'sais pas trop seux ocquo que je n'le f'thait pas yun d'chais jours.”
“J'vit qu'l'affaithe dév'nait sérieuse. “Mais, Merrienne,” j'l'y dit, avec un p'tit souôrit, “as-tu caltchulé que si tu n'travaillais pas, tu trouv'thais les jours bein longs.”
“Oh, man doux nouffé,” ou dit. “A qu'menchi, je m'lév'thais dans les onzeheuthes, et je m'prepath'thais un bouon dêjeuné. En faisant chonna, j'pouôrr'rais m'pâssé d'diné. Dans l'arlevée j'éthais m'prom'né, épis au sé j'éthais un taxi pour me porté ès pictures ou à tchique grande bordée à West Park. Y'a ocquo tchiques hérpins dans la cauche, et nou dit qu'y'a d'bouons restaurants en Ville ouèsque nou peut soupé. Ne t'gène pas, man Ph'lip, je n'mouôrrais pas d'engni.”
J'vos avoue, Moussieu, que j'tais bétôt au m'séspé, car la Merrienne peut être pûs têtoigne qu'une mule quand ou veur, et je m'viyais, comme oulle avait dit, dans un salé pité. “Mais, ma chièthe Merrienne,” j'l'y dit, “si tu m'abandonnais d'la sorte, tchesque je f'thais?”
“Ch'est à té d'y pensé,” ou raiponnit, “et n'oublie pas que si j'me décidais, tu couoch'chais sûs l'sofa, et j'mett'rais la porte d'ma chambre à la clié. Enfin, n'en v'la assez pour asêsé. Tchèsqu-en est pour les Sénateurs?”
“Ch'est la nominâtion Lundi,” j'l'y dit. “J'te dithai après.”
Ph'lip
1954
Viyiz étout: