|
A Moussieu l'Éditeu de La Chronique Lé v'la d'sannées qué j'prends vot' fielle, Pour tâchi d'savé les nouvelles D'la djerre, d'la mer, d'la politique; Enfin, ya d'tout sus La Chronique. Mais, l'diantre, s'en est pas fallu fort Qu'j'enne pitchîsse vot' papi hors bord, Car nou s'ennyie d'avé à lièthe Tréjous la même boustré d'histouèthe. Sustout quand nou n'y comprend rain, (J'yai passai bein tu temps en vain) Chla vos met d'si mauvaise humeur, Qu'nou fait des "daimmes" sus l'rédacteur. Je d'meuthe dans une pârraisse du Ouêste, Et coumme bain des lecteurs de l'Este; Né sis pas si bain renseigni Comme ceux qui régnent dans l'Vier Marchi. Nou vein vos dithe qué tel et tel, A l'heuthe qué l'monde tait en sommeil, V'nait d'être prînt "en flagrant délit," Portant un sac dé jenne sait tchi. V'là toutes les gâzettes en affaithe A tchi f'thait l'pus grand mystaithe. Un biau jeune rat v'nait d'être happai Tout près d'sen creux au Monte l'Abbai. Et vous, les gens d'la Vieille Chronique, Dêcouvrîtes qué y s'applait "Nique"; Ou z'imprimîtes un tas d'versais, Pouore d'jâble! il n'avait pliain ses braies. Mais nous du Ouêste, j'enne savions pas T'chest qu'voulait dithe tout ch'tembarras; Opprès qué j'avions tout erlu, Le pus fin d'nous n'y viyait qu'blu. Le titre était "Pouore Nicolas," En suite un long galimatchas De fain, d'carrottes, dé trent-quat' louis. S'faisait maman: "mi goodness mee." Mé, je m'mârri! j'dis à nos gens: "J'prends La Chronique v'la pus d'vingt ans, Mais j'vais lus dithe lé Samedi d'Noué, Je ne serai plus un abonné." Ah! dame chest vrai, j'ai tréjous di, "Chein qu'y à d'bouan de Mess Vickri, Jamais n'imprime un tas d'gnolin, Ouais qu'ou n'y connaît san Latin. Alors jé starreti dé d'siais nous, Et j'prins la 'bus' dé Bram Sêlous. J'navais pon tait jusqu'à la Ville Dépis l'mois d'Juin, "cherchi des pilles). J'men fut tout dré au Vier Marchi Afin d'vos démander pour tchi Qu'ou vos fichiyaient des campagnards? Quand tchest qué j'vé, qu'Maît' Flip Malzard! Quand y oui chêque j'men allais faithe, Y m'dit qué si jé voulais m'taithe, Qui m'cont'tait tout au long l'histouethe, Mais j'avais bain d'la peine à l'craithe! Par chein qui m'dît dé Nicolas, Jé l'prins pour être un biau gras gâs, Qu'jé tchiquefais remertchi dans la Ville Happant les garçons pour le "drill." Je cré qu'il a un grand jaune querre, Dans tchi qui s'tchein bein à l'êcherre, Ch'est bein rare qu'il y sait tout seu, Mais y n'sont jamais pus qué deux. Sa jument pathaissait raide bain Quand y la maintenait sus du fain, Mais acheteu qu'ou n'a pus d'carrottes Y va au pas, faut pas qu'ou trotte. N'en v'la assez sus not' héros. Qui n'âge pas rôder dans mes quios, Car si j'lis prends! hélas! hélas!! Que Dieu protége l'pouore Nicolas!! J'comprends bain acheteu La Chronique. J'criayis d'abord qué ch'tait une trique. Mais qui profite, le pouor "Nicklesse," Des leçons qué ya donné "La Presse." A beintôt, Moussieu, votre ammin, "Wild West" St. Pierre, Noël, 1897 |
Viyiz étout: