I' tait un vrai balloque, lé Dâvi. I'n'fit pon grand'chose à l'êcole, si ch'n'tait qué jouer des farches pouor êtibotchi ses pouôrres maîtres et maitrêsses. I' tchittit l'êcole à l'âge dé quatorze ans, à lus grand souôlagement, mais i'n'avait pon autcheune qualificâtion – en êffet i'n'pouôrrait dgéthe êp'ler san nom ni compter pus haut qu'nou peut en faithe sus les dés. Tout d'même, i 'tait un fort garçon, et i' pouvait travailli à flieur d'bras du sinne dé jeu jusqu'au solé couochant.
Auprès tchique temps, i' d'vînt machon et pitcheux d'pièrre, mais la machonn'nie, ch'est un dû mêtchi. P'ser des pièrres, les pitchi, faithe des battues d'mortchi, monter et ramonter l'êtchelle auve des tas d'pièrres sus l's êpaûles, un ouaîselée d'chiment tchi pèse pus qu'l' dgiâbl'ye, tout ch'na n'vos fait pon engraîssi !
Pouor li donner du couothage, Dâvi prînt deux'trais p'tits d'gouts d'temps en temps, et acouo pus tchiquefais étout, tchi fit mârri sa bouonnefemme. À la fîn, chein tchi dév'thait arriver, s'arrivit !
Un jour quand il avait l'vé l'coute un mio trop toute la matinée, Dâvi pèrdit s'n êtchilibre au haut d'la longue êtchelle et tchit pataplian ! par tèrre, et les pièrres étout ! V'là tchi li fit du ma, j'vos garantis ! I' restit là, pliat comme eune crêpe ! Pouor bein en dithe, il avait la minne d'eune saûciche tch'a 'té êcrasée par un rouôleux à j'va !
Des vaîsîns li apportîtent siez-li, à la maîntchi pus mort qu'vivant. I' l' mîntent sus san liet, et sa femme li laîssit toute la niet à distiller sa ventrée d'vîn et dg'ieau d'vie tch'il avait gouôté si librement d'vant l'accident.
Lé lend'main au matîn, Dâvi n'avait pon bouôgi un orté. I'tait allongi sus l'liet, la fache grise comme eune taupe, l's ièrs freunmés, l'corps pus raide qu'la justice. Pas un seul brit n'avait pâssé ses lèvres, pon même des gros mots.
À la fîn, sa femme s'décidit d'sonner pouor l'docteu. Quand il arrivit à la maîson, ou lé m'nit à la chambre. I' c'menchit s'n examinâtion du corps, en châtchant sa tête et faîsant des " tut,tut " d'temps en temps. Auprès tchiques minnutes, la femme à Dâvi, bein gênée, n'pouôrrait pus enduther, et d'mandit au docteu, " Tch'est qu'ous en pensez, Docteu ? "
" Eh bein, j'pense qu'vot' houmme a prîns sa dreine haleine ! "
Man doue d'la vie, i's'pâssit eune chose qu'nou n'vait pon souvent !
Lé mort fit " Nânnîn ! ", en châtchant la tête à drouaite et à gauche.
Sa femme, tout à fait mârrie, sautit coumme eune minne !
" Tais-té ! Vièr ivrouongne ! Ma fé, tu pense d'en saver mus qu'Moussieu l'Docteu!"
Ou pouvez m'craithe s'i' vos est acouo possibl'ye, Dâvi n'patchit pon ses vailes. L'mort l'happit à l'âge dé nénante-trais ans, acouo gâté d'béthe. Ch'est pour seux et cèrtain qu'i'y a un Bouon Dgieu pour les cheins tchi baivent à tare-larigot étout !
ASW
Viyiz étout: