Né v'là pouortchi qu'Sion s'sa tchéthué coumme un clios par cause dé té, et Jéthusalem veindra d's êqu'sîns d'muthâles êcrouôlées et l'mont d'la maîson coumme eune mouaie ès bouaîs'sies.
Mais ès dreins jours i' s'adonn'na qu'lé mont d'la maîson du Seigneu s'sa pliaichi sus l'haut des montangnes et êl'vé par sus les monts et les peupl'yes y'afflioqu'thont, et un amas d'nâtions îthont et dithont, "V'n-ouos-en, montons au mont du Seigneu et à la maîson du Dgieu d'Jâcob et i' nos f'tha assaver ses c'mîns et jé s'sons dgidés par sa pathole; ch'est en tchi la louai s'dêhal'la d'Sion et la pathole du Seigneu d'Jéthusalem." Et i' jug'gea entre des grandes nâtions et des fortes nâtions bein au liain s'sont gouvèrnées s'lon ses jugements; lus sâbres s'sont martélés en fièrs dé tchéthue et lus lanches en coutchieaux d'gardîn; les nâtions n'lus lév'thont d'aut' lus sâbres entré ieux, et la connaîssance d'la dgèrre s'sa passecrite à tout janmais. Mais châtchun s'assiétha souos sa vîngne et souos san fidgi et fis d'âme n'lî f'tha peux: car la bouoche du Seigneu d's armées l'a procliâmé. Ch'est en tchi toutes les nâtions îthont par lus c'mîns, châtcheune au nom d'san dgieu, et nous j'îthons au nom du Seigneu not' Dgieu ès âges d's âges.
Mais té, oh Béthléhem à Ephrata tch'est p'tit parmi les fanmil'yes dé Jûda, v'là tchi s'dêhal'la d'té iun tchi gouvèrnétha Israël pouor mé, tchi s'dêhale des touos vièrs temps, du temps d'Âdam.
J'sis-t-i' malheutheux! Ch'est en tchi j'sis coumme auprès l'avoût des frits d'Êté, coumme les dreins brîns d'vèrjus; n'y'a rein à mangi, pon même eune figue heûthive pouor man d'si.
Viyiz étout: