A L'Éditeux d'La "Nouvelle Chronique de Jerri."
Chier Mousieu,
En vos remerciant bain des fais d'avé mins ma lettre entoir le qu'min d'fé dans votre papi, j'prends la liberté de vos écrire une autre fais.
Chute fais, chez pour vos d'mandé s'ou pourraîtes mé dire chêque y fait qui n'y'a pon de "Post Office" à la Baie d'St.-Brelade.
Quand j'tais là, y'a quique temps, toutes les fais que j'voulais posté une lettre, y fallait que j'allisse à St.-Aubin. Une sérais, j'fu obligi d'y allé qu'il en pétillait d'plie assez pour fliotté un septante-quatre, en d'scendant le Mont-les-Vaux, oués qu'il
Y'a de biaux petits creux,
N'ou z'y fouorrai des beux,
et oués que, comme de coîteume, nous n'viyait lèrme.
En pâlant du Mont-les-Vaux, y sont à faire une belle route, par exemple, à ch'teu, de St.-Aubin à la Baie d'St.-Brelade. Oul est si courte qui faudra sorti d'St.-Aubin de bouan matin, s'nou veur être à St.-Brelade en temps pour dîné. Ouès qu'était lus - (bon, j'peux pon trouvé d'mot pour "brains") - tête quand y zen firent lé plian? Quant au vier Mont, dans l'état qu'il 'tait quand j'tais en Jêrri, né m'en pâlez pas. En d'scendant pour m'en allé au steam le jour qué j'men r'vins, mes "traps" qu'étaient sus l'haut d'men "cab" lus z'en allirent bain tranquillement, bi dé run, dans l'canné. Faut espéré qu'la nouvelle route, quoiqu'ou soit un p'tit longue, sera un mio millieure.
Mais à notre sujet d'la Poste. Y faut p't'être aussi bain que j'vos dise qu'la Baie de St.-Brelade n'est pas chain qu'oul 'tait y'a huit ou neuf ans, quand n'ou pouvait lierre dans yun d's'Alménâs d'Jêrri: "Comprising a few fishing huts and leaving nothing to desire."
À ch'teu, y'a à peu près une quarantaine de maisons, sans conté les p'tites bijuques. Et pis, y'a toute la Moië, mais les Moiëtins ont l'choiê d'allé sé à St.-Pierre ou à St.-Aubin posté lus lettres, y font p't'être aussi bain de ne se pliaindrent pas.
Y'a long temps que l'monde gronnent à St.-Brelade, y gronnent et grommâchent, mais je n'cré pon qu'il aient oquo yeu lé quouorage de lus pliaindrent sé dans les papiers, ou à la Poste Générale.
S'ou z'aviêtes la compliésance de mettre chez deux ou trais lignes ichin dans votre estimable papi, p't'être qué v'là qui pouorait condire à quique chose yun d'chez bouans jours.
Criyis mé, chier Mousieu, jusqu'à la préchaine, avec salutations respectueuses, votre très humble serviteurs, un
"LONDRONNAIS."
Londres, chu 15 Janvi 1866.
Viyiz étout: