Les Pages Jèrriaises

Jônas

Chapitre 1, vèrsets 1-7

Et la pathole dé Dgieu vînt à Jônas fis Amitté et lî dit: "Dêhale-té! Va-t-en à Ninivé, chutte grande ville, et prêche là-bas! Ch'est en tchi lus maûvaîtchi m'est connue."

Et Jônas s'dêhalit et happit la pathe du bord d'Tarsis pouor s'cârrer du Seigneu, et i' d'valit à Joppé et là i' vit un navithe tchi 'tait pouor vailer à Tarsis. I' payit san viage don et s'embèrtchit pouor aller acanté ieux à Tarsis pouor s'cârrer du Seigneu. Et l'Seigneu env'yit eune dgêle sus la mé et y'eut eune si grande tempête en mé qu'lé navithe sembliait êt' pouor capsaïzer. Les navidgants fûdrent êffrités et priyîdrent châtchun à san dgieu à li, et nou-s'env'yit ho'-l'bord la cartchaîson à seule fîn d'dêlêter l'navithe. Mais Jônas avait d'valé dans la câle où'est qu'i' s'tait tâné et y dormait coumme un pourpais. Lé cap'taine vînt et lî dit, "Pouortchi qu'tu'es à dormi d'même? Lève-té! Prie à tan dgieu! Tan dgieu pens'sa ofûche à nous et nos êpaîngn'na!" Les navidgants lus entré-dîdrent, "Allons, halons ès noeuds à seule fîn d'saver l'chein à bliaûmer pouor chu malheu." Et don i' halîdrent ès noeuds, et l'sort fut à Jônas.

 

Chapitre 1, vèrsets 15-17

Épis i' souôl'vîtent Jônas et l'pitchîtent dans la mé, et la mé s'calmit. Et coumme i' 'taient bein êffrités du Seigneu, i' sacrificyîtent et prêtîtent des sèrments. Et l'Seigneu griyit un grand paîsson tch'engaûmit Jônas, et Jônas pâssit trais journées et trais niétchies dans l'ventre du paîsson.

 

Chapitre 2, vèrsets 1-10

Épis Jônas priyit au Seigneu san Dgieu dé d'dans l'paîsson et dit: "Dans man d'so j'criyais au Seigneu et i' m'rêponnit. D'l'avanteu d'l'enfé j'fis un brai et tu'êcoutis ma vouaix. Tu m'as pitchi dans l'avanteu, dans l'tchoeu d'la mé, et l'fliot 'tait tout à l'entou d'mé; touos tes louêmes et tan boulais m'înnondaient. Et j'dis, 'J'sis cachi hors d'ta veue; coumme tchi qué j'èrvèrrai tan saint templ'ye?' L's ieaux mé n'yaient, l'avanteu m'entouothait, lé vrai m'enhèrmélait la tête ès réchinnes des monts. La tèrre m'enmuthaillait à janmais coumme jé d'valais, mais tu'as pêtchi ma vie dé d'dans l'enfé, oh Seigneu man Dgieu. Coumme ma vie r'tithait, j'gardais la mémouaithe du Seigneu et ma priéthe t'avînt dans tan saint templ'ye. Les cheins tchi louangent des faux dgieux ont r'nonchi lus espé, mais j'prêch'chai d's actions d'grâces et des sacrifices à té. J'èrpaiethai chein qu'j'ai promîns. Lé salut veint du Seigneu!"

Épis l'Seigneu pâlit au paîsson et i' dêgouôsilyit Jônas sus la tèrre sècque.

 

Chapitre 4, vèrsets 5-11

Épis Jônas s'dêhalit d'la ville et s'assiévit à l'Êst d'la ville et s'griyit un abri là. I' s'assiévit dans s'n ombre en espéthant chein tchi s'adonn'nait d'auve la ville. Et l'Seigneu Dgieu fit craître eune vîngne tchi vînt ombragi Jônas. Et Jônas 'tait divèrsément heutheux par cause dé chutte vîngne. Mais l'matîn d'auprès à sinne dé jeu l'Bouôn Dgieu env'yit un vèr tch'avrônit la vîngne et ou rigotit et mouothit. Un co l'solé l'vé, l'Bouôn Dgieu env'yit un vent brûlant d'l'Êst et v'là tchi caûffait si caud qué Jônas en fut tout êffeutchi et d'mandit d'pouver mouothi. I' dit, "Mus vaut mouothi qué vivre dé même!"

Et l'Seigneu dit à Jônas, "As-tu drouait dé t'mârri entouor la vîngne?"

Et i' dit, "Oui, mârri assez pouor en mouothi!"

Épis l'Seigneu dit, "Tu'en avais bein pitchi d'chutte vîngne pouor tchi tu n'avais pon travailli et qu'tu n'avais pon tchultivé; ou poussit dans eune niet et s'êmortit dans eune niet. Et j'n'éthais-t-i' pon pitchi don d'Ninivé, chutte grande ville, dans tchi qu'i' d'meuthent pus d'chent vîngt mille pèrsonnes dans la bliâse, et d'abouon d'bestchias étout?"

 

Viyiz étout:

 

Les Pages Jèrriaises