Joël
Chapitre 1, vèrsets 5-7
Rêvil'-ous, ivrouongnes, et plieuthez! Piailliz, touos vous b'veurs dé vîn; piailliz par cause du frais vîn, ch'est en tchi il a 'té halé d'vos lèvres. Eune nâtion a envahi man pays, eune piêssante armée qu'nou n'peut pon compter; oulle a les dents d'un lion, les cros d'eune lionne. Oulle a passecrit mes vîngnes et avraûné mes fidgièrs. Ou l's a êcorchi et en fliantchi la p'liche, en laîssant lus branques blianchies.
Chapitre 2, vèrsets 28-32
Et auprès j'vèrséthai m'n Esprit sus toutes les gens. Vos fis et fil'yes prophétîs'sont, vos vièrs rêv'thont des rêves, vos jannes hoummes vèrront des vîsions. Même sus mes sèrvants et sèrvantes jé vèrséthai m'n Esprit ches jours-là. J'mouontréthai des mèrvelles ès cieux et sus la tèrre, du sang et du feu et d's aûtchies d'feunque. Lé solé s'sa touônné en nièrcheu et la leune en sang d'vant la v'nue du grand et tèrribl'ye jour du Seigneu. Et châtchun tch'învoqu'tha l'nom du Seigneu s'sa sauvé; ch'est en tchi sus l'Mont Sion et à Jéthusalem y'étha du salut coumme lé Seigneu a dit, et parmi les rêcappés qu'lé Seigneu somm'tha.
Chapitre 3, vèrsets 2-3
J'rassembliéthai toutes les nâtions et l's amèn'nai ava dans la vallée d'Josaphat et là j'en f'thai ma jug'gie, pouor lé compte dé man peupl'ye et m'n héthitage Israël, viyant qu'i' l's ont parféné parmi les nâtions. Il' ont sparti ma tèrre, et loté man peupl'ye et trotchi des garçons pouor des souiches et vendu des fil'yes pouor du vîn et en ont bouaissonné.
Chapitre 3, vèrsets 11-16
V'n'-ouos-en, toutes les nâtions tout l'tou et rassembli'-ous là. Env'yie ava tes dgèrrièrs, oh Seigneu. Qu'les nâtions lus trînmoussent, qu'i' veingent à la vallée d'Josaphat, car ch'est là qué j'm'assiéthai pouor jugi toutes les nâtions vaîthinnes. Cope atout la sèrpe car l'avoût est meûthi. Va-s'y, pilvâque, car l'preinseu est heuné d'vèrjus. Les tchuaux dêbordent, car lus mauvaîtchi est horte les bornes. Tchi fliotchet, tchi fliotchet dans la vallée d'la justice! Ch'est en tchi l'jour du Seigneu est d'amain dans la vallée d'la justice. Lé solé et la leune sont nièrchis, et l's êtailes né lithent d'aut'. Lé Seigneu hueûle dé Sion, et fait ouï sa vouaix d'Jéthusalem, et les cieux et la tèrre craûlent. Mais l'Seigneu est un abri pouor san peupl'ye, eune fortérêsse pouor lé peupl'ye d'Israël.
Viyiz étout: