Le Ménage ès Feuvres,
St. Ouën.

Lé 5 d'octobre, 1974.

Moussieu l'Rédacteu,

Un vièr diton nouos dit : Qué tu veurs ou qu' tu n'veurs pas, si tu n'meurs janne vieillèche tu d'veindras! Mais i' n'faut pon qu'un vyi s'mett' dans l'idée qu'sa vieillèche est la fîn du monde pour li, car un aut' diton nouos dit Nou n'est janmais trop vièrs pour apprendre!, et acouo un aut' nouos ramémouaithe qué chein qu'nou-s-apprend janne nou n'oublyie pas vyi.

Eh bein, un moussieu Jèrriais tch'a huiptante-siex ans - il appréche mème dé huiptante-sept est l'exempl'ye vivant dé ches ditons-là. Ch'est Ph'lippe Ahyi, Êtchuyer, MA, BSc, FRSA, FCP, historien, conféthencyi, auteur dé plusieurs livres et Membre d'Honneu dé La Société Jersiaise. I' nouos dit un discours à L'Assembliée d'Jèrriais dans la Salle Parouaîssîale dé St. Jean, vendrédi, l'vîngt-sept dé septembre, comme i' n'y a qu' li tchi peut l'faithe, et d'eune voix retentissante, comme nouos l'dit l'cantique, qué nou pouvait ouï d'un but d'la salle à l'autre, et i' r'chut, méthitouaithement, l's appliaûdissements d'touos les membres. Et né v'la d's années tch'il a êmèrvilyi L'Assembliée auve des discours historiques. I' n'y a qu' à liéthe les rapports dé quart d'an dans les bulletins pour en vaie la preuve.

Sans doute Moussieu Ahyi n'est pon l'seul ancien tch'a consèrvé ses fatchultés mème au d'là d'êt' sus l'âge. Lé fanmeux William Ewart Gladstone, homme d'Êtat, 'tait acouo Preunmié Minnistre d'Angliétèrre en 1894 à l'âge dé huiptante-six. Et l'célèbre George Bernard Shaw 'tait acouo à êcrithe des lettres ès gâzettes et faithe des conféthences quand il avait pus d'nénante ans. I' mouothit à l'âge dé 95 ans.

Un aut' auteur, Eden Philpotts, dé Devonshire en Angliétèrre, 'tait acouo à êcrithe des romans quand i' mouothit à l'âge dé nénante-huit. Et i' n'faut pon oublier nouot' bouanne Reine Victoria, tch'avait huiptante-deux quand vint l'trépas en plieine possession d'ses fatchultés. Et pis Messire Winston Spencer Churchill, don? N'en v'la un exempl'ye : Soudard, homme d'Êst, Preunmié Minnistre, peintre, auteur, orateur - nou peut mème mettre un grand et cétera au but d'tout chenna! Il 'tait bein en allant et avait l'esprit présent jusqu'à la fîn d'ses jours quand i' mouothit dans sa nénant'tch-ieunième. Nou considéthe un homme dans sa prînme quand il a dans les quarante ans, mais ch'ti-là y'était acouo, nou peut dithe à septante ans. N'en v'la iun tchi nouos donne la preuve qué l'âge n'empêche pon la présence d'esprit.

Et j'm'èrsouveins qu'ma grand-grand-mèthe, née Lisabé L'Brun, faisait d'fichues bouannes gâches à fouée mème duthant la dreine année d'sa vie quand ou pâssit l'pas dans sa nénantième. Ou m'en donnait ieune, bein beurrée atout eune couoche dé beurre tch'avait la couleu d'or, touos les vendrédis quand jé v'nais ichîn au Ménage la vaie fouângner.

Mais ch'n'est pon seulement d'nouos jours qué l's anciens ont 'té r'nommés pour aver l'esprit présent. Ou n'avez qu'à liéthe lé chîntchième chapitre dé Genèse dans vouot' bibl'ye. I' nouos dit qu'Adam fut péthe d'un fis (Seth) à l'âge dé chent trente ans, et tch'il eut des fis et des filles duthant les préchains huit chents ans et mouothit à l'âge dé neu chent douze ans, mais i' n'est pon dit s'i' fit autcheune chose èrmérquabl'ye dans chutte longue vie.

Il est pliein d'vielles gens, l'chîntchième chapitre dé Genése. Enos vêtchut neu chent chînq ans, Kénan neu chent dgix, Mahalaléel huit chent nénante-chinq, Hénos trais chent souoxante-chînq. Compathé ès autres, i' mouothit janne, ch'ti-là! Et nouos v'la à un vyi tch'avait un nom tch'est bein connu d'nouos jours - lé bouanhomme Méthusela! À chent huiptante-sept ans i' fut péthe dé Lémec, et i' vêtchut acouo sept chent huiptante-deux ans d'pus et mouothit au bel âge dé neu chent souoxante-neuv ans!

J'pourrais continnuer à en mentionner d'autres, mais j'm'en vais m'contenter d'iun - Noé, fis Lémec, lé Noé qué l'Bouân Dgieu chouaisit pour bâti l' Arche tchi l'sauvit, li et sa femme et sa fanmile, et un coupl'ye d'toutes les bêtes et d's ouaîsieaux sus la tèrre dans san temps quand vînt lé d'luge. Et auprès lé d'luge et l'rêtablyissement sus la tèrre secque, Noé mouothit à l'âge dé neu chent chînquante ans! I' n'dait pon y'aver d'doute qué chu bouanhomme Noé-là est l'anchêtre des Nouaux d'St. Martin, et i' peuvent en êt' ordgilleurs!

Autrèment qué dans l'cas d'Noé, Genèse né nouos donne pon un accompte des faits dé touos ches vièrs-là sènon tch'i' fûdrent péthes d'êfants quand il' 'taient dêjà deux fais pus vièrs qué la londgieu d'la vie d'à ch't heu. Prannons don couothage. Y'a preuve qué j'pouvons acouo aver l'esprit pointu dans nouot' vieillèche!

George d'La Forge
 

Viyiz étout: