Le Ménage ès Feuvres,
St. Ouën.
Lé 25 dé juîn, 1977.
Moussieu l'Rédacteu,
J'vai dans la gâzette qué la populâtion d'l'Île en gângne touos les jours. Les nouvieaux v'nus veinnent d'arriver au Mangni d's Augrès. Ieune des gâzettes montrait l'portrait d'deux ordgilleuses méthes et lus êfants nouvieaux-nés. J'ai oublié à tchi tribu tchil' appartchiennent - la tribu “Gorille” pour ieune des deux, i' m'sembl'ye. N'împorte, j'ai 'te d's heuthes à reunminner et êprouver à m'èrsouv'nîn à tchi qué chutte m'nèe Gorille-là r'sembl'ye. J'ai veu eune pèrsonne dé tchiquebord tchi lî r'sembl'ye comme deux d'goûts dg'ieaux. Mais iou? Etait-je-t-i' en Améthique, dans l's Îndes ou en Afrique? Ch'est drôle comme nou peut pèrdre d's heuthes dans des temps à penser à tchiquechose dé mème sans pouver rêsoudre la tchestchion. Eune chose tch'est r'mèrquabl'ye: la mode a 'té ches dreines années pour les hommes d'aver l'vîsage barbu. Les nouvieaux v'nus ont l'corps barbu mais l'vîsage nu. V'la tchi s'en va-t-i' êtablyi eune nouvelle mode?
Lé drein v'nu au Mangni d's Augrès a un long nez pointu, mais i' né r'sembl'ye pon à autcheune pèrsonne, ch'tî-là, sénon qué quand i' s'sa grand il îtha p't-êt' fouôrrer san nez où'est tch'i' n'a qu' faithe, car nou n'trouve pon des nids d'freunmions dans toutes les carres ni souos toutes les pièrres! I' s'adonne qué j'connais l'nom d'sa m'mèe; ch'est Missis Tapir!
Chein qué j'voudrais vaie Moussieu Durrell faithe au Mangni d's Augrès est dé dênichi touos les crapauds tchi restent en vie en Jèrri, et êprouver à en êl'ver eune nouvelle quantité pour r'apeuplier l'Île. Ch'est mangnifique dé sa part dé peuplier l'Île dé marmoûsets, mais l'crapaud est un vrais Jèrriais et l'seul dé sa sorte au monde, et ché s'sait rêellement tchiquechose dé l'empêchi dé dispathaître à tout janmais.
Eune chose tchi met les gens sus lus nèrs est l'brit et l'combat, sustout la niet quand v'la tchi l's empêchment dé dormi. Ch'est riditchule dé laîssi les boutiques dé paîsson et d'doleuses dé patates ouvèrtes jusqu'a deux heuthes du matîn en ville, et d'aver un tas d'îndividus à maîntchi êbédés à bailli d'lus goules et crialli à tue-tête et disteurber lé r'pos des gens du vaisinné. Ch'est seux qu' lus clientèle auprès mînniet est composée dé bouaissonneux et goudalleux d'biéthe tch'y vont en tchittant l's aubèrges. Et i' donnent souvent d'l'embarras à la police. I' faut espéther qué Moussieu l'Connêtabl'ye d'la Ville s'en va faithe ches boutiques-là freunmer à mînniet.
Il étha p't-êt' dé l'opposition dé la part des grosses têtes du Tourisme, mais j'espéthe tch'il étha l'couothage dé lus dithe qué s'i' veulent les garder ouvèrtes jusqu'a deux heuthes i' faudra tch'i' veingent aîdgi à la police auprès mînniet, à la pliaiche dé pouloter lus précieux touristes!
J'viyais dans la gâzette, étout, qué les jannes tchi tchittent l'êcole ont d'la peine à trouver du travas. I' y'a pourtant un manque dé main d'oeuvre dans les fèrmes. À tch'il age tch'i' tchittent l'êcole à ch't heu? Jé n'sai pon, car jé d'meuthe hors Jèrri. Dans man temps à l'êcole ch'tait à treize ans, et j'n'avions pon d'peux d'travailli dans les clios à ch't' âge-là. I' vont probabliément à l'êcole jusqu'a pus qu' treize ans à ch't heu et dév'thaient êt' grands et forts assez pour aîdgi sus l'“Harvester” à dêfoui les patates. Ch'n'est pon si dû sus l'dos comme à gliainer ou siéthe la frouque lé temps pâssé. Et les gages d'à ch't heu? Man Doue d'la vie, ch'est eune pétite forteune à compather au temps jadis! Mais j'crai bein qu'les jannes d'à ch't heu sont si accouôteunmés à aver tout fait pour ieux tch'i' n'ont pon l'ambition d'gângni pour ieux-mèmes. Y'a sans doute des exceptions. J'eus l'pliaîsi d'vaie eune belle janne fille d'êducâtion au clios l'aut' jour quand j'allis vaie ses pathents à St. Jean. Eune janne fille tch'a bein pus d'êducation qu' mé et tch'est actuellement êdudiante à un univèrsité en Nouormandie, mais à la vaie habilyie pour lé travas dans les clios et à la fraid d'la s'maine pâssée, j'viyais bein qu' ch'est du vrai sang Jèrriais et campangnard qu'oulle a dans l'corps.
La vraie manniéthe dé rêussi dans la vie est dé travailli dû et d'êt' prêt à entréprendre autcheune tâche en autchun temps d'bésoin. Jé n'entends pon vouler dithe qué touos les cheins tchi tchittent l'êcole dév'thaient pâsser lus vie dans les clios, mais quand i' y'a bésoin d'main d'oeuvre au clios et tch'i' n'y a pon d'aut' travas en veue pour lé moment, né v'la l'opporteunité d'apprendre tch'est tch'est la vie du fèrmyi (eune chose qué les villais n'connaîssent pon!) et gângni des sou en mème temps, tout en attendant pour la vocation voulue. Nou n'peut faithe autchun mêtchi sans apprendre tchiquechose, et tant pus qu' nous-apprend tant pus qué v'la tchi d'veint utile dans tchique temps dans la vie.
George d'la Forge
Viyiz étout: