Ch'n'est pon viyant qu' ch'est man garçon, mais j'vouos asseûthe tch'i' n'y en a pon un aut' dans la pâraisse à l'battre à fèrmer. Il est quâsi aussi bouan comme mé, et sans m'vanter j'peux dithe qué nouot' fèrme est ieune des miyeuthes dé Jèrri. Nouot' fanmile s'est tréjous întérêssie dans l's affaithes dé la pâraisse. J'sis principa et l'Connêtabl'ye démande souvent m'n avis quand i' y'a tchiquechose d'împortance dans L's Êtats et tch'i' faut voter pour ou contre.
Un membre d'nouot' fanmile a 'té collecteur d'aumônes ou seurvillant à l'églyise dépis l'temps jadis. J'ai jugi les bêtes à la Société d'Agritchultuthe pour bein d's années, et ch'est bein r'connu qu' mes vaques sont r'chèrchies par l's Améthitchains. J'ai 'té tormenté d'êt' Député bein des fais, et dans l'temps du Louothi et d'la Rôsé j'tais ieune des réchinnes du Louothi. Ch'tait quand lé Louothi c'menchit à gangni toutes les êlections qué les Rosièrs perdîdrent couothage et qu' lus parti mouothit d'dêpiet.
Mèrrotte, ma bouannefemme, m'a aidgi à prospéther. Faut lî donner san drouait. Oulle a des p'tits boudins dans la tête, et i' n'y a pon pus au-faite qué lyi dans eune maîson. Ou peut quâsi mènagi la fèrme aussi bein comme mé. Quand j'ai ieu à aller en France acater des j'vaux oulle a souangni d's affaithes comme un homme. Et ses mèrvelles, et ses bourdélots! Enfin, j'pouorrais vouos chanter ses louanges pour eune heuthe dé temps. Mais y'a eune chose qué jé n'comprends pon: Oulle est si intelligente sus bein des choses - la preuve en est qu' oulle eut l'avis dé m'mathier - et acouo quand veint la tchestchion du mathiage dé nouot' fis Fraînque oulle en montre si p'tit, d'avis. Ou s'est mînse dans la tête tch'i' dév'thait mathier la fille d'un homme d'affaithes ou d'un moussieu d'la Cour.
Jé n'la comprends pon. Betsy Millais, la fille du propriêtaithe dé la fèrme à côté d'la nouotre, eune fèrme d'eune chînquantaine dé vrégies d'raide bouanne tèrre, n'a janmais hanté un janne homme, et j'sai bein qu' nouot' Fraînque lî pliaît. Ou y'a tréjous ouffèrt eune pépèr'mène quand j'nouos sommes assis dans l'banc d'san p'pèe à l'églyise, pour li'aîdgi à pâsser l'temps quand l'sèrmon est trop long. Et bein souvent j'ai r'mèrtchi qu' ou lî prannait l'bras en r'vénant quand nou n'viyait pon la main d'vant sé. Né v'la la fille tch'i' dév'thait mathier et p't-êt' dév'nîn propriêtaithe dé chutte fèrme-là. Oulle est seule êfant.
En distchutant l'affaithe auve ma bouannefemme eune séthée tchi tchiyait d'a plyie, j'lî d'mandis tch'est tch'i' y'avait mînt d'si drôles d'idées dans la tête au sujet du mathiage dé Fraînque.
“Eh bein,” ou m'dit, “as-tu janmais pensé ès longues heuthes qu' un homme travâle sus eune fèrme? Il est otchupé dans les tèrres touos les jours - à griffonner, brîsi, touânner, hèrchi, plianter, sèrclier, houetter, dêfoui et Bouan Dgieu sait tchi, sans pâler d'nyits au vrai. Mais pon seulement ch'la - y'a les réchinnes à rentrer touos l's hivièrs, les patates à mâter, les bêtes à souangni sept jours la s'maine, les r'muer et les traithe. Nou n'en finnit janmais. Touos les sièrs tu'es à paûtrindgi dans l's êtabl'yes quandi qu' d'aut' hommes sont à feunmer lus pipes auprès du feu et bailli d'lus becques à lus femmes ou jouer ès domminos auve lus mousses. Et quand les g'niches et les vacques sont en r'nouvelant tu pâsse la maintchi d'tes nyits à les souangni. Crai-tu qu' tu'es payi pour tout chu travas-là?”
“Mais oui,” j'lî dis, “tu sai bein qu' j'avons tchiques chents louis à la banque. Et pis j'avons gentiment d'rentes à r'chéver et d's hypothèques conventionnelles sîmpl'yes - jé n'sai pon trop bein tch'est qu' ch'la veurt dithe, mais j'sai bein qu' l'întéthêt d'ssus vaut la peine d'èrchéver - et d's obligâtions, sans pâler d'la valeu d'la fèrme.”
“Vèthe, j'sai bein tout chonna,” Mèrrotte mé dit, “mais i' n'faut pon oublier qué j'pèrdînmes deux chents louis ch't année!”
“Comment qu' tu cartchules chenna?”, j'lî d'mandis.
“Eh bein,” ou m'dit, “l'année pâssée, nouot' profit 'tait chîn chents louis, ch't' année j'n'avons pon fait pus qu' trais chents louis, ch'est en tchi v'là tchi montre eune pèrte d'deux chents louis!”
“J'n'avais pon cartchulé ch'là d'mème, mé,” j'lî dis.
“Mais i' n'y a pon deux mannièthes à cartchuler du profit,” ou m'dit. “J'n'ai pon 'té à l'êcole pour rein, tu sai. Man p'pèe disait tréjous qu' j'éthais 'té présidente du Conmité des Finnances dans L's Êtats si j'avais 'té garçon!”
George d'La Forge.
L'homme propose, mais Dgieu dispose
(Siette)
Ottawa, Ontario,
Cannada.
Lé 16 dé novembre, 1974.
“Mais j'en avons assez,” j'dis à Mèrrotte. “Si nouot' garçon en fait autant comme nou quand i' s'sa à fèrmer sus san compte, i' s'sa bein. Et penses à l'avantage dé l'mathier à la seule êfant d'nouot' vaîsîn.”
“Bah!”, ou' m'rêponnit, “tu n'penses janmais pus liain qu' tan nez. Tu crai qu' j'avons des sou? Êrgarde touos l's êcrivains et l's avocats, sans pâler des mêssieux d'la Cour. Né v'la d's hommes tch'en font, des sou. I' font des sou comme des êcales. Et ch'est des pouorres dgiâtres d'fèrmièrs comme té tchi lus en donnent. Et pis, crai-tu qué j'veur vaie nouot' fis égdachi sa pé à londgieu d'jours comme tu l'as fait toute ta vie? Tu n'as pon 'couo chînquante-chînq ans et té v'la dêjà a maîntchi estropié! Tu'as pèrdu tes dents dé d'vant, tes j'veux sont gris et les gambes sont vèrques à forche d'aller à j'va sus la jeunment. Tu'étais pourtant bieau garçon quand tu m'faisais la carre!”
“Mais véthe, j'tais bieau garçon,” j'lî dis. “J'n'ai pon changi fort!”
“Oh nan!”, ou m'dît, “tu crai qu' tu n'as pon changi fort? Êrgarde dans l'mitheux!”
“Eh bein,” j'lî dis, “tu'as vieilli un mio étout, ma bouannefemme. Né v'la d'tchi qué j'faisons tous en mème temps. Ch'n'est pon pour dithe qué tu n'est pon 'couo eune belle femme. J'n'ai pon envie dé t'trotchi pour eune pus janne.”
“Eh bein,” s'fit Mèrrotte, “jé n'sis pon en train dé t'trotchi n'tout. Mais r'vénons au sujet d'nouot' garçon. À m'n idée, ch'est bein mus d's'assiéthe à côté du feu dans eune belle office touos les jours à êcrithe des contrats et faithe un tas d'sou qué d'sé saccagi la carcasse à tchithier du feunmyi et d'l'êpu et labouother la tèrre. Né v'la pourtchi qué j'crai qu' nouot' garçon n'dév'thait pon mathier la fille d'un fèrmyi.”
“Mais i' n'est pon êcrivain, nouot' garçon,” j'lî dis.
“Jé l'sai bein,” ou m'dît. “Mais tch'est tchi l'empêche dé mathier la fille dé iun d'ches mêssieux-la? Il héthit'tait bein pus en mathiant la fille d'un êcrivain qu' la valeu d'eune fèrme.”
“Enfin,” j'lî dis, “né v'la l'heuthe tch'avanche. Il est temps d'aller s'couochi. Nou-s-en r'pâl'la.”
*****
Quand Fraînque èrvînt d'la ville l'aut' sé i' pathaîssait tout content. Jé d'mandis à sa m'mèe tchi l'avait mînt d'si bouanne heunmeu.
“Eh bein,” ou m'dît, “j'm'en vais d'dithe un ségret. Quand j'allis vaie Moussieu Ricart, nouot' homme d'affaithes, au sujet d'la rente qué j'allons rembourser, Fraînque y vint auve mé. I' s'adonnit qu' Mad'mouaîselle Ricart 'tait dans l'office et san p'pée nouos la fit à connaître, mais i' nouos dit qu' ou n'avait pon l'temps d'rester à nouos pâler viyant qu' ou s'en allait à St. Cliément pour jouer l'piano pour eune fête au probytaithe. Fraînque ouffrit d'lî porter dans l'quèrre et j'y allais auve li. Ch'tait ch'là tchi nouos fît r'vénîn tard dé la ville pour baithe du thée.
“Ch'tait bé d'vaie chu bieau coupl'ye ensembl'ye. Quand j'arrivînmes à St. Cliément, Fraînque aîdgit à Mad'mouaîselle Ricart à d'valer dé d'dans l'quèrre. I' s'adonnit qu'ou choppit en d'valant et il eut à l'attraper dans ses bras pour l'empêchi d'tchaie et sa joue s'trouvit contre la sienne. V'la tchi m'fît penser au temps qu' tu m'faîsais la carre! J'sai bein qué ch'tait tout par accident, mais ch'tait touchant à vaie. J'vis bein qu' Fraînque lî pliaîsait bein, à Mlle. Ricart. J'l'ai învitée à baithe du thée tchique dînmanche.”
“Mais, Mèrrotte,” j'lî dis, “es-tu seûthe qué chutte janne fille f'thait eune bouanne femme pour nouot' garçon? Tu sai bein qu' oulle est tréjous parmi la grandeu et qu' ou n'a pon 'té accouôteunmée à travailli. Ou n'peut p't-êt' mème faithe eune bollée d'soupe, sans pâler d'souangni d'eune fèrme!”
“J'ai pensé à tout chenna,” ou m'dît, “Fraînque pouorra travailli dans l'office à Moussieu Ricart, et i' pouorront d'meuther en ville et aver eune sèrvante!”
“Mais tch'est tch'héthit'ta la fèrme?”, j'lî d'mandis.
“Eh bein,” ou m'dît, “Fraînque s'en va en héthiter tchi s'sait fèrmyi ou mathié à eune fille tch'est riche!”
“Mais, ma pouorre femme,” j'lî dis, “tu sai bein qu' j'ai fait un tas d'frais d'ssus ches dreines années. D'neuves poutres dans l'preinseu, eune neuve cotte à couochons, èrgrandi la tchèrquéthie, un neu lief sus la boulanguethie, èrgraie la grange, et des neus nos sus la maison. J'ai acaté eune bouanne jeunment pour rempliaichi la pouorre vielle qué j'avais acaté à eune vendue et tch'était câssée - la seule fais dans ma vie qu' j'ai 'té trompé en acatant des j'vaux. Et oulle 'tait rosse à féther. I' fallait bailli eune boutelle dg'ieau d'vie au forgeux pour lé faithe la féther. J'ai fait touos ches frais-là pensant qu' Fraînque s'en allait s'mettre à la travailli et la faithe valer sus san compte iun d'ches jours. Crai-tu tchi pouorrait en souangni et d'meuther en ville?”
“Nannîn”, s'fît Mèrrotte, “mais i' pouorrait la louer!”
“Véthe,” j'lî dis, “à tchique bachouard tchi la laîss'sait paître ès coucous!”
(À siéthe)
George d'La Forge.
L'homme propose, mais Dgieu dispose
(Siette)
Trenton, Michigan,
U.S.A.
Lé 23 d'novembre, 1974.
Nouot' vaisin, Charles Millais, vint m'vaie l'aut' jour. Il est à penser d'tchitter l'fèrmage viyant tch'i' n'sé trouve pon bein dépis tchique temps.
“Ch'est mes ringnons,” i' m'dît. “Et pis, tu sai, j'ai souvent ma dans l'dos, et la méd'cinne des docteurs né m'fait pon d'bein. La seule chose tch'i' m'soulage est quand ma bouannefemme mé frotte lé dos atout d'ieau d'vie camphrée et m'l'enfliube atout du rouoge flianné. Et pis j'sis pliein d'rhonmatisses dans les hanques. Touos l's hivièrs j'attrape lé 'Branchitis' et j'sis oublyigi d'prendre du sithot d'cârottes dans l'jour et des vèrres cauds en m'couochant.”
I' mé d'mandit si j'avais pensé d'mett' man garçon sus san compte et m'dit tch'i' n'y avait pon un garçon au monde tch'il aimethait mus qu'li à louer sa fèrme, et tch'i' li louaîthait à bouan marchi et tch'i' li laîss'sait touos l's êffets d'fèrme. J'vis bein tch'il avait la mème idée comme mé au sujet d'Betsy et Fraînque, mais sans doute i' n'ósait pon l'dithe.
Quand j'li fis l'complyîment d'li d'mander comment tch'était Missis Millais et Betsy, i' m'dit tch'il 'taient d'charme et tch'il 'taient toutes les deux dé s'n idée qué Fraînque f'thait des sou s'i' louait lus fèrme car i' savent bein tch'il est un bouan garçon et un bouan travailleux, et pis i' m'dit qu' Betsy l'avait tréjous admithé d'pis tch'il' allaient à l'École du Dînmanche ensembl'ye. J'lî dis qu' j'allais en pâler à Fraînque et à sa m'mée.
La fille à Moussieu Ricart s'en veint baithe au thée dînmanche en huit. La maîson est toute tchulbutée. Mèrrotte à fait d's arrangements pour èrpap'ser l'parleux, peindre, ramonner la cheunm'née et Bouan Dgieu sait tchi. Et pis, ch'est d'neus ridgieaux tchi nouos faut, en un neu tapis, et i' faut r'bouogi tout l'meubl'ye. Lé piano s'sait mus ichîn et l'sofa là. Les portraits sont trop à la vielle faichon. I' faut d'valer l'chein d'la vielle Reine et l'chein tchi montre lé navithe dans tchi m'n oncl'ye Ph'lippe 'tait contrémaître et qu'nou vait entrer dans la caûchie à Napl'yes, et l'chein dans tchi Papa Giffard avait fait l'tou du monde quand il 'tait Cap'taine, et les muchi dans l'armouaithe. Des bieaux grands navithes à vailes - des portraits qu' nou n'pouorrait pon acater dans les boutiques à ch't heu car i' n'y a pèrsonne tchi peut en faithe dé mème dé nouos jours. Et pis i' s'en va faller en acater d'neufs. J'pense bein qu' ché s'sa des portraits dé tchique pré en Êcosse atout des montangnes au liain et des vaques à paître tchi n'sont pon Jèrriaises et qu' pèrsonne n'ont veu, et p't-êt' dé la Tour Effel à Paris.
Ch'est assez pour faithe un homme sé mett' à baithe. Tch'est qu' les gens du temps pâssé dithaient s'i' pouvaient r'vénîn et vaie chein tchi s'pâsse à ch't heu. Dépis qu' les stînmes ont rempliaichi les navithes à vailes, et tchi veint du monde d'Angliétèrre, nou ouait un tas d'Angliaîchin'nie par les c'mîns, et d'pis qu'un Angliais vînt dans l'Île vendre du chînment un tas d'nouos belles vielles maîsons d'fèrme en sont couvèrtes. Mèrrotte né fait qué d'pâler d'la belle tchuîsinne dans la caûminne tch'a 'té acatée par un moussieu Êcossais tchi l'a r'bâtie comme neuve en d'houors et en d'dans. I' pathaît tch'il est pouôrri d'sou viyant qu' ses viels gens n'en dêpensîdrent pon iun dans lus viant. “Ch'est r'mèrquabl'ye,” s'fait Mèrrotte, “tch'est qu'nou peut faithe auve des vielles maîsons!”
Mèrrotte crait étout qué j'dév'thions èrmeublier la bouanne chambre et y mettre un neu dressinne-tabl'ye en méaguinné auve un grand mitheux et un p'tit banc en d'vant pour s'assiéthe à graie ses j'veux en cas qu' Mad'mouaîselle Ricart veindrait pour couochi.
I' faudra huiler la clianque du héchot dans l'gardîn étout, et l'sèrclier et râteler l'gravi. I' faudra ouvri la grand' porte car nou n'peut pon faithe la d'mouaîselle entrer par la porte d'la tchuîsinne. Oulle éthait à pâsser l's êtabl'yes, et i' n'ont pon l'odeu dg'ieau d'Colongne!
J'mé d'mande pourtchi dêpenser touos ches sou là pour rempliaichi des meubl'yes tch'étaient bouans assez pour nouos anciens tch'avaient travailli dû pour, et tchi nouos en avaient fait un présent d'mathiage.
* * * *
Mad'mouaîselle Ricart vînt baithe du thée hièr. Eune charmante fille. Jé n'sis pon êtonné qué l'pouorre Fraînque est êgalué. Oulle a d'bieaux j'veux corlés, eune pétite ronde fache auve des joues finnes comme du v'lous et l's ièrs lî pétil'yent comme des êtailes. Dès qu' oulle arrivit j'vis bein qu' ou s'èrconnait à chouaîsi un homme. Ou m'dit qué j'pathaissais si janne qu' oulle avait d'la peine à r'connaître lé péthe d'auve lé fis! Et quand ou m'fit l'honneu d'm'embraichi j'vis bein qu' Mèrrotte c'menchait dêjà à êt' jalouse. Ou m'dit, étout, qu' ou n'pouvait pon s'înmaginner pourtchi qué j'n'avais pon 'té chouaîsi pour êt' Juge et qu' ou s'en allait d'mander à san p'pèe dé m'proposer la préchaine fais. Autcheun aut' homme qué mé éthait 'té êblioui par touos ches complyîments là!
(À siéthe)
George d'La Forge.
L'homme propose, mais Dgieu dispose
(Siette)
Trenton, Michigan,
U.S.A.
Lé 23 d'novembre, 1974.
Nouot' vaisin, Charles Millais, vint m'vaie l'aut' jour. Il est à penser d'tchitter l'fèrmage viyant tch'i' n'sé trouve pon bein dépis tchique temps.
“Ch'est mes ringnons,” i' m'dît. “Et pis, tu sai, j'ai souvent ma dans l'dos, et la méd'cinne des docteurs né m'fait pon d'bein. La seule chose tch'i' m'soulage est quand ma bouannefemme mé frotte lé dos atout d'ieau d'vie camphrée et m'l'enfliube atout du rouoge flianné. Et pis j'sis pliein d'rhonmatisses dans les hanques. Touos l's hivièrs j'attrape lé 'Branchitis' et j'sis oublyigi d'prendre du sithot d'cârottes dans l'jour et des vèrres cauds en m'couochant.”
I' mé d'mandit si j'avais pensé d'mett' man garçon sus san compte et m'dit tch'i' n'y avait pon un garçon au monde tch'il aimethait mus qu'li à louer sa fèrme, et tch'i' li louaîthait à bouan marchi et tch'i' li laîss'sait touos l's êffets d'fèrme. J'vis bein tch'il avait la mème idée comme mé au sujet d'Betsy et Fraînque, mais sans doute i' n'ósait pon l'dithe.
Quand j'li fis l'complyîment d'li d'mander comment tch'était Missis Millais et Betsy, i' m'dit tch'il 'taient d'charme et tch'il 'taient toutes les deux dé s'n idée qué Fraînque f'thait des sou s'i' louait lus fèrme car i' savent bein tch'il est un bouan garçon et un bouan travailleux, et pis i' m'dit qu' Betsy l'avait tréjous admithé d'pis tch'il' allaient à l'École du Dînmanche ensembl'ye. J'lî dis qu' j'allais en pâler à Fraînque et à sa m'mée.
La fille à Moussieu Ricart s'en veint baithe au thée dînmanche en huit. La maîson est toute tchulbutée. Mèrrotte à fait d's arrangements pour èrpap'ser l'parleux, peindre, ramonner la cheunm'née et Bouan Dgieu sait tchi. Et pis, ch'est d'neus ridgieaux tchi nouos faut, en un neu tapis, et i' faut r'bouogi tout l'meubl'ye. Lé piano s'sait mus ichîn et l'sofa là. Les portraits sont trop à la vielle faichon. I' faut d'valer l'chein d'la vielle Reine et l'chein tchi montre lé navithe dans tchi m'n oncl'ye Ph'lippe 'tait contrémaître et qu'nou vait entrer dans la caûchie à Napl'yes, et l'chein dans tchi Papa Giffard avait fait l'tou du monde quand il 'tait Cap'taine, et les muchi dans l'armouaithe. Des bieaux grands navithes à vailes - des portraits qu' nou n'pouorrait pon acater dans les boutiques à ch't heu car i' n'y a pèrsonne tchi peut en faithe dé mème dé nouos jours. Et pis i' s'en va faller en acater d'neufs. J'pense bein qu' ché s'sa des portraits dé tchique pré en Êcosse atout des montangnes au liain et des vaques à paître tchi n'sont pon Jèrriaises et qu' pèrsonne n'ont veu, et p't-êt' dé la Tour Effel à Paris.
Ch'est assez pour faithe un homme sé mett' à baithe. Tch'est qu' les gens du temps pâssé dithaient s'i' pouvaient r'vénîn et vaie chein tchi s'pâsse à ch't heu. Dépis qu' les stînmes ont rempliaichi les navithes à vailes, et tchi veint du monde d'Angliétèrre, nou ouait un tas d'Angliaîchin'nie par les c'mîns, et d'pis qu'un Angliais vînt dans l'Île vendre du chînment un tas d'nouos belles vielles maîsons d'fèrme en sont couvèrtes. Mèrrotte né fait qué d'pâler d'la belle tchuîsinne dans la caûminne tch'a 'té acatée par un moussieu Êcossais tchi l'a r'bâtie comme neuve en d'houors et en d'dans. I' pathaît tch'il est pouôrri d'sou viyant qu' ses viels gens n'en dêpensîdrent pon iun dans lus viant. “Ch'est r'mèrquabl'ye,” s'fait Mèrrotte, “tch'est qu'nou peut faithe auve des vielles maîsons!”
Mèrrotte crait étout qué j'dév'thions èrmeublier la bouanne chambre et y mettre un neu dressinne-tabl'ye en méaguinné auve un grand mitheux et un p'tit banc en d'vant pour s'assiéthe à graie ses j'veux en cas qu' Mad'mouaîselle Ricart veindrait pour couochi.
I' faudra huiler la clianque du héchot dans l'gardîn étout, et l'sèrclier et râteler l'gravi. I' faudra ouvri la grand' porte car nou n'peut pon faithe la d'mouaîselle entrer par la porte d'la tchuîsinne. Oulle éthait à pâsser l's êtabl'yes, et i' n'ont pon l'odeu dg'ieau d'Colongne!
J'mé d'mande pourtchi dêpenser touos ches sou là pour rempliaichi des meubl'yes tch'étaient bouans assez pour nouos anciens tch'avaient travailli dû pour, et tchi nouos en avaient fait un présent d'mathiage.
* * * *
Mad'mouaîselle Ricart vînt baithe du thée hièr. Eune charmante fille. Jé n'sis pon êtonné qué l'pouorre Fraînque est êgalué. Oulle a d'bieaux j'veux corlés, eune pétite ronde fache auve des joues finnes comme du v'lous et l's ièrs lî pétil'yent comme des êtailes. Dès qu' oulle arrivit j'vis bein qu' ou s'èrconnait à chouaîsi un homme. Ou m'dit qué j'pathaissais si janne qu' oulle avait d'la peine à r'connaître lé péthe d'auve lé fis! Et quand ou m'fit l'honneu d'm'embraichi j'vis bein qu' Mèrrotte c'menchait dêjà à êt' jalouse. Ou m'dit, étout, qu' ou n'pouvait pon s'înmaginner pourtchi qué j'n'avais pon 'té chouaîsi pour êt' Juge et qu' ou s'en allait d'mander à san p'pèe dé m'proposer la préchaine fais. Autcheun aut' homme qué mé éthait 'té êblioui par touos ches complyîments là!
(À siéthe)
George d'La Forge.
L'homme propose, mais Dgieu dispose
(Conclûsion)
San Antonio, Texas,
U.S.A.
Lé 7 dézembre, 1974.
Mèrrotte a réalisé s'n ambition. Nouot' garçon Fraînque et Mad'mouaîselle Ricart sont engagis. Fraînque nouos l'dit hièr au sé et l'annonce est dans “La Chronique” à matîn. I' m'pathais drôle dé vaie ch't' annonce-là ouaithe qué nou s'y attendait. Mais j'pense à la pouorre Betsy Millais tch'a tréjous aimé Fraînque. Ch'est pourtant vrai. La gâzette est d'vant mé et né v'chîn l'annonce:-
“J'avons l'pliaîsi d'annoncer les fianchailles dé Mad'mouaîselle Nancy Caroline Salmon dit Ricart, seule fille dé Moussieu Théophile Salmon dit Ricart, Êcrivain, du Haut d'La Ville, St. Hélyi, et dé défunte Madanme Salmon dit Ricart, à Fraînque Tourgis, fis unique dé Maît' Pierre Philippe Tourgis, Propriétaithe à St. Ouën, et dé Missis Tourgis.”
Fraînque s'en va tchitter l'fèrmage. I' s'en va dans l'office à san bieau-péthe prétendu pour apprendre à êt' Êcrivain. Tch'est qué j'peux dithe à nouot' anmîn et vaîsîn Millais tchi voulait lî louer sa fèrme et m'aîdgi à l'mett' sus san compte? J'vai la nouotre, et la sienne étout, pâsser dans les mains d'êtrangièrs quand jé s'sons trop vièrs pour les labouother nouos-mèmes. Lé Fraînque tcheint d'mé, ou viyiz. Il apprend vite, et par chu temps-là i' s'sa Êcrivain ou Avocat et étha pèrdu l'goût d'la campangne et vendra la fèrme d'ses anchêtres.
****
Nouos jannes gens fûdrent mathiés la s'maine pâssée. J'sis bein content qu' tout chu tripot-là est finnit. La cérémonie d'mathiage eut lieu à l'Églyise Pârouaîssiale. Mèrrotte mé fit m'habilyi comme un moussieu d'la Cour à un dêjeuner d'Assise d'Héthitage - eune blianche quémînse, un dû collet, eune longue néthe câsaque à pannieaux, des souliers en tchui vèrni et un bill-tappeur. J'avais quâsi honte dé m'montrer d'mème. J'viyais bein qu' les vaîsîns avaient du fanne dé m'vaie. Et pis j'avais des biancs gants, et j'avais d'la peine à marchi viyant qu' mes souliers 'taient trop p'tits. Mèrrotte fut si longtemps à êprouver à m'habilyi à san goût qué j'feûnmes quâsi tard à l'églyise.
Moussieu Ricart pathaîssait à s'n aîse dans d's habits comme les meins - du dgiâtre si j'peux comprendre ch'la! Les femmes 'taient en robes dé souaie. I' n'y a pon d'doute qué ma belle-fille valait la peine dé vaie. Ch'est seux qu' toutes les filles du vaîsinné 'taient jalouses dé la vaie dév'nîn Missis Fraînque Tourgis, et ouaithe qué j'l'aime bein jé n'peux sénon penser à chein tch'i' s'arrivethait s'oulle avait à souangni d'eune fèrme!
Nouot' vaîsîn Millais m'dit tch'i' n'pouvait pon v'nîn ès neuches viyant tch'i' n'est pon bein. J'criyais qué ch'tait eune extchuse, mais ma fîngre j'vis la vaituthe du docteu dans san bel comme j'èrvénions d'l'églyise. La pouorre Betsy, qu' j'éthais tant voulu comme belle-fille, a fait la minne d'aver un mauvais fraid dépis l'engagement d'Fraînque, et quand j'l'învitis ès neuches ou s'mînt à plieuther et mé d'mandit d'l'extchuser.
****
Lé festin d'neuches est pâssé. Moussieu Ricart mangit comme un foueux et nouos dit qu' nou n'trouvait pon d'fricots en ville comme j'avions sus la tabl'ye, et tch'i' s'est d'mandé bein des fais pourtchi tch'i' n'fut pon fèrmyi à la pliaiche d'êt' enfreunmé dans eune office êté comme hivé. I' m'dit qu' man fis s'en allait êt' bein dans s'n office, et tch'i' n'y avait pon d'doute tch'i' d'veindrait homme d'affaithes étout - mais qu' en tout cas ch'tait eune bouanne chose d'aver eune fèrme comme la meinne à r'tchaie d'ssus en cas d'malheur. Les jannes mathiés sont houors à Londres pour lus ieune dé myi. Ouaithe qué j'sis content d'vaie man garçon heutheux, j'avais l'tchoeu gros dé l'vaie s'en aller.
****
Y'a trais s'maines qué Fraînque et sa femme sont en Angliétèrre. I' sont pour èrvénîn Dînmanche tchi veint.
Jé n'pouvais pon m'endormi la niet pâssée. I' m'sembliait qué la niet n'finnithait janmais quand j'ai ouï l'hôlouoge sonner quatre heuthes, et v'la tchi m'a fait tchaie sus ma fache et mé l'ver tard à matîn. Comme jé d'valais la montée pour dêjeuner, j'ai ouï un frédas dans la tchuisinne. Ch'tait Mèrrotte tchi s'était êvannie! Auprès l'aver ravigotée, j'mé sis mîns à liéthe la gâzette qu'oulle avait à la main quand j'l'ai trouvée dans l'aithe. Y'avait deux annonces dédans. Né v'chîn la preunmiéthe:-
BANQUEROUTE
“J'èrgrettons d'aver à annoncer qué Moussieu Théophile Salmon dit Ricart, Êcrivain et homme d'affaithes populaithe en ville pour bein d's années, est souos l'fou, et qué sa propriêté est dêcliathée en d'sastre.”
L'aut' annonce 'tait parmi les décès. Oulle annonçait la mort, quâsi subite, dé nouot' anmîn et vaîsîn, Charles Millais. Y'en avait un p'tit but pus bas dans “La Chronique” tchi disait:-
“Ch'est auve grand r'gret qu' j'avons à annoncer l'décès du Sieur Charles Millais. Homme charmant et affabl'ye, il 'tait propriêtaithe dé ieune des miyeuthes fèrmes d'St. Ouën. J'présentons nouos voeux d'sincéthe sympathie à Madanme Millais et à Mad'mouaîselle Betsy, sa fille eunique et seule héthitchaithe.”
George d'La Forge.
Viyiz étout:
