San Antonio, Texas,
U.S.A.
Lé 26 d'dézembre, 1970.
Moussieu l'Rédacteu,
"I' n'a qu'eune idée tchi l'dominne, ch'est d'faithe des sou! Papa dîsait à Manman eune séthée auprès l'thée en s'assiévant au pid du feu. Bon!, i' continnuit, en dêhalant sa pipe en pliâtre dé d'dans sa pouchette dé veste, j'ai laîssi man chipaûdé sus l'enclieunme dans la forge; j'm'en vais aller l'ramâsser!
Èrpôses-té, à la pliaiche dé té r'léver d'ta grand'tchaîse pour t'en r'aller dans la forge. J'm'en vais t'donner l'neu chipaûdé en tchui qu'nouot' bieau-fis Fraînque d'Aubert dé La Mouaie t'donnit à Noué. Manman lî dit. Et né v'chîn du p'tun qu't'avais mîns dans l'titheux. Il est grand temps qu't'env'yis chutte vielle vessie d'couochon-là, qu't'appelle un chipaûdé, sus l'haut d'la maie! Mais tu saute du coq à l'âne, man bouanhomme. Tch'est qu'a l'idée tchi l'dominne dé faithe des sou?
Oh! Ch'tî-là?, Papa lî dit. Jé n'm'en vais pon mentionner d'noms. I' veint tréjous aver sa junment féthée à la forge, ouaithe tch'i' y'en a ieune pus près d'siez-li, mais tu l'connais bein.
Eh bein, Manman lî dit, tu dai, bein saver pour tch'est qu'les gens veinnent faithe féther lus j'vaux à la forge. Tu sai bein qu'nouot' grand, l'George Francis, a la r'nommée d'êt' lé milieu fétheux dé j'vaux en Jèrri! Et tu y'est expèrt té-mème ouaithe qué tu n't'en vantes pon!
Véthe, Papa li dit, i' pathaît qu'ch'est un don dans nouot' fanmile, d'êt' bouans fétheurs dé j'vaux, et' ch'est vrai que l'George y'est fanmeux. J'n'ai acouo janmais veu un j'va - trantchil ou quédole - tchi lî faîthait peux. J'espéthe tch'i' s'en va faithe bein à La Côte. Hélas! J'l'ai mantchi dans la forge, nouot' garçon! Il est sus les runs à Paspédgia, mais j'en doute s'il y restétha longtemps. Les Robîns n'sont pon fanmeux pour payi d'bouans gages, et tu sai bein comment tch'il est ambitieux, l'George.
Ch'est vrai, s'fit Manman, jé l'manque étout, mé, ouaithe qué j'n'en pâle pon fort, mais chein tch'est pour être es'sa - et d'pis tch'i' voulait s'en aller jé n'pouvions pon l'empêchi! Mais tch'est tch'i' t'fait penser qué ch't homme-là aime à faithe des sou?
Ch'est li-mème tchi s'en vante!, Papa li dit. I' n'fait qu'd'en pâler quand i' veint à la forge!
Eh bein, Manman lî dit, i' dév'thait t'dithe comment tch'il en fait, des sou. J'en avons grand bésoin nouos-mème. Auve chu système ichîn d'êt' payis eune fais par an - dans la saison d'patates - et finni par en pèrdre quâsi la maîntchi quand la saison est mauvaise pour les tardives, jé n'viyons janmais d'sou d'l'avant auprès qu'j'avons payi lé fé dans la forge, et la somme dé rente qué jé d'vons à Maît' Douard Le Cornu!
I' n'a pon d'peux dé l'dithe, Man Doue, d'la vie, comment faithe des sou, Papa dit à Manman, mais i' faut du capita pour quémenchi, et comme tu veins d'nouos l'dithe, ch'est d'tchi que j'n'avons pon! La manniéthe tch'i' s'y prend est d'aver s'n homme d'affaithes à lî faithe à saver quand y'a des p'tites sommes dé rente assîngnabl'yes à vendre. Des mêssieux tch'en ont n'veulent pon prendre la peine d'aller les r'chéver touos l's ans. Il' aiment mus les vendre pour dé l'argent comptant. J'pâle dé deux-s'trais siextonnièrs et mains d'rente. Comme ch'est si p'tit, et qu'les mêssieux tch'en ont veulent lus en dêfaithe, i' les vendrent à mains d'lus valeu. Ch't homme-là va l's acater et pis i' les r'vend à lus propre valeu à des pèrsonnes tch'en ont bésoin pour l's assîngner ès gens à tchi tch'i' dêvent d'la rente! Ch'est bein sîmpl'ye quand nou veint à cartchuler!
Mais, est-che qu'un homme d'affaithes veurt êt' embêté d'faithe des p'tites affaithes dé mème? Manman dit à Papa.
Bein seux!, i' li dit. Un atchêt d'rente veurt dithe lé pâssage d'un contrat, et v'la tchi met des sou dans sa pouchette. Et pis, bein souvent i' peut aver l'client à r'vendre la rente à un autre dé ses clients. Dans un cas d'mème v'la tchi li donne un aut' contrat à pâsser. Il' aiment les contrats, l's hommes d'affaithes, et ch'est au chein tch'en pas'sa l'pus touos l's ans!
Ch'la n'dait pon lî rapporter tant, à ch't homme-là, Manman dit à Papa. Lé profit n'dait pon êt' formidabl'ye, à acater et r'vendre des p'tites sommes dé rente dé mème!
Nan!, Papa lî dît, mais i' fait des sou d'eune aut' manniéthe étout. Et ch'est d'tchi qué jé n'voudrais pon faithe mé-mème. I' prête des sou à des pouôrres dgiâtres d'faillis fèrmièrs, et à d'aut' gens tch'ont d'la propriêté comme garantie. Tant pus tch'il' en veulent, tant pus i' lus en prêtent et beintôt les v'la souos l'fou et lus propriêtés lî tchaient dans la main! I' n'a dêjà trais! Ch'n'est pon ravissant tch'i' s'vante qué châtchun d'ses fis héthit'ta d'eune fèrme à sa mort!
Eh bein, Manman dit à Papa, j'aimethais mus mouothi d'faim qué d'faithe d'ité! J'aime mus penser à la pathole dé St. Marchi quand i' nouos dit dans l'siexième chapitre dé s'n êvangile: 'Ne vous amassez point des trésors sus la terre, où la teigne et la rouille gâtent tout'!
George d'La Forge
Viyiz étout: