Et i' m'fit les pâsser tout au tou, et j'en viyais un fièr amas dans chutte grande vallée et i' 'taient sés coumme un sictîn;

Et i' m'dit: "Fis d'l'houmme, ch'est-i' pôssibl'ye qu'ches os s'tchis lus ravigot'tont?" Et j'rêponnis en dithant: "Ch'est à té, oh Seigneu!"

Et i' m'dit acouo eune fais: "Prêche à ches os-là, et di-lus: oh os s'tchis, êcoutez la pathole du Seigneu, Né v'chîn chein qu'lé Seigneu dit à ches os: 'Êv'chîn, j'm'en vais soûfflier l'esprit en vous à seule fîn qu'ou r'vivêtes; Et j'm'en vais vos r'habilyi d'muscl'yes et vos enfliuber d'chai et vos couvri d'pé et soûfflier l'esprit en vous et ou r'viv'thez; épis ou saithez bein qué mé, j'sis l'Seigneu.'"

J'prêchis don coumme i' m'avait c'mandé, et comme jé prêchais y'eut un pataflias et eune grînch'chie et né v'là l's os tchi lus r'joignaient, châtchun à san parchonnyi. Et j'l's èrgardais et né v'là les muscl'yes et né v'là la chai tchi l's enfliubait, et né v'là la pé tchi les couvrait, mais i' n'avaient ni d'esprit ni d'soûffl'ye.

Et i' m'dit: "Prêche au vent, prêche à l'esprit, prêche au soûffl'ye, fis d'l'houmme, et di: 'Lé Seigneu a c'mandé: veins des quat' vents, oh vent, oh esprit, oh soûffl'ye, et soûffl'ye sus ches morts à seule fîn qu'i' r'vivent.'"

J'prêchis don coumme i' m'avait c'mandé, et l'esprit s'soûfflyit en ieux, et i' fûtent ravigotés et i' s'mâtîtent, rangis coumme eune grand' armée.

Épis i' m'dit: "Fis d'l'houmme, ches os sont touos l's êfants d'Israël. Et i' dithent, 'Nos os sont s'tchis, not' espé est hors, et j'sommes à banon.' Prêche don et di-lus: 'Né v'chîn la pathole du Bouôn Dgieu - j'rouvre vos tombes, oh man peupl'ye, et j'vos mène dé d'dans vos tombes, et j'vos condithai dans l'pays d'Israël.'"

Viyiz étout:

• La Bibl'ye

• Des vèrsets d'la Bibl'ye en Jèrriais au hâsard