Car ch'est par la grâce qu'ous avez 'té sauvés, par la fouai, et chennechîn n'veint pon d'vous - ch'est l'don dé Dgieu.
Ch'n'est pon par l's oeuvres, à seule fîn qu'pèrsonne n'en sait ordgilleux.

Mais achteu dans Jésû Chri vous tchi soulêtes êt' êlouongnis ont 'té rappréchis dans l'sang du Christ. Ch'est en tchi il est not' paix tch'a fait des deux, l'iun; et par tchi la mitouoyenneté entré nous, tch'est chein tchi nos a sparti, s'est êcrouôlée. Dans sa chai il a mîns fîn à la spartance d'entré nous, la spartance d'la louai auve ses c'mandements et règl'yes à seule fîn d'graie en li-même un houmme èrgrée au run des deux pouor êtablyi la paix, et à seule fîn d'raccorder les deux auve lé Bouôn Dgieu et chenna dans un corps par la crouaix en tuant ainchîn chu d'saccord. Et i' vînt don prêchi la paix à vous tchi 'têtes êlouongnis et ès cheins tchi 'taient d'près.
 

Ou n'êtes d'aut' coumme les cheins tchi n'ont pon d'pliaiche dans l'rouoyaume dé Dgieu, mais ous êtes mèrtchis parmi les saints et la fanmil'ye dé Dgieu, totés sus la fondâtion d's Apôtres et prophètes, Jésû Chri lî-même étant la preunmié pièrre atout tchi tout l'bâtisse, bein machonné, veint eune sainte maîson dé Dgieu dans l'Seigneu; dans tchi, vouos acanté les restants, sont mathiés ensembl'ye coumme un siez-sé du Bouôn Dgieu dans l'Esprit.
 

Coumme dé raison, châtchun d'nous a r'chu un don partitchulyi s'lon la grande divèrsité d'la généthôsité du Christ. Coumme chenna a 'té êcrit dans l's Êcrituthes: "Tu'as ramonté amont, en emm'nant des prisonnièrs, et tu'as atchilyi des dons parmi l's hoummes." (Èrmèrtchiz bein chein tch'y'est explyitchi: s'nou dit: "il a ramonté", v'là tchi veurt dithe qu'il avait d'valé d'vant chenna dans l's avanteurs d'la tèrre. Lé chein tchi d'valit est l'même tchi ramontit pus haut qu'les cieux à seule fîn d'accomplyi toutes choses.) Et il avait distîndgi ses dons s'lon les pèrsonnes: y'en a tch'ont 'té nommés des m'sagièrs, d'aut's - des prophètes, d'aut's - des porteurs d'la bouonne nouvelle, d'aut's des gardgiens et d's ensîngnants. Il avait s'parti ses dons parmi les gens pouor les graie pouor lé travas dans l'monde dé rassemblier touos dans l'corps du Christ jusqu'au temps quand nou s'sa tout rêunni dans la fouai et la connaîssance du Fis dé Dgieu, épis nous s'sa êcaloppé et d'âge, s'lon la bouonne mésuthe du Christ.

Ch'est en tchi jé n'sommes pon condamnés d'êt' tréjous coumme des p'tits mousses assujettis à des léçons tchi changent et r'chantent coumme des cos d'vents, ou à la scouôtrise des hoummes tchi chèrchent malinnement à teurtre la véthité. Nan-dgia, ch'est à nous dé t'nîn bouon à la véthité dans l'amour, et d'nos êcalopper dé touos les mouoyens dans l'chein tch'est la tête, lé Christ. Ch'est d'la tête qué l'corps entchi est rassemblié et r'grée, auve châque jouainte liée s'lon l'bouon ordre, et meuthit ainchîn dans l'amour.
 

...et à r'mett' lé nouvel houmme, créé s'lon Dgieu dans la justice et la sainteté d'la véthité.

Qu'autcheune mauvaise pathole né sorte dé vot' bouoche mais qué vouos discours faichent du bein ès cheins tchi l's entendent.