Ecclésiaste
Chapitre 1, vèrsets 2-10
"Tchi tas d'soûffliéthies!" qu'lé Prêcheux dit, "Tchi tas d'soûffliéthies! Tout est raîque d'la soûffliéthie. Tch'est qu'lé monde gângnent d'toute lus tripot'tie qu'i' tripotent souos l'touannement du solé? Eune genethâtion s'en va et eune aut' généthâtion s'en veint mais la tèrre reste tréjous d'même. Lé solé s'lève et l'solé s'couoche, et s'trînmousse iou qu'i' s'èrlève. I' vente au Sud, épis au Nord; lé vent touanne et ratouanne, et r'veint tout l'tou. Touos les dous vont à la mé mais la mé n'en est pon remplyie; les dous coulent coumme d'amors iou qu'i' coulent. Les mots sont gênants, pus qu'nou peut dithe; l'yi n'est pon satisfait d'vaie; l'ouothelle n'a janmais assez d'ouï. Chein tch'a 'té est chein tchi r's'sa, et chein tch'a 'té fait est chein tchi r's'sa fait. N'y'a rein d'nouvé souos l'touannement du solé. Y'a-t-i autcheune chose dé tchi nou dit, "V'là tch'est nouvé"? Chenna a 'té dêjà bein d'vant nous.
Chapitre 1, vèrsets 14-17
J'vis tout chein tch'a 'té fait souos l'touannement du solé et né v'là tout est d'la soûffliéthe et d'la couôrrie souotre lé vent. Chein tch'est teurt n'peut pon êt' dêteurt et chein tchi manque n'peut pon êt' compté. Jé m'dis, "J'ai gângni d'la grande sagesse, pus qu'touos les cheins tchi règnaient sus Jéthusalem d'vant mé; et m'n esprit a connu d'la sagesse et du scîn." Et j'm'avisis pouor êtudier la sagesse et êtudier la folie et la folâtréthie. J'rêalîsis qu'chennechîn étout est raîque d'la couôrrie souotre lé vent.
Chapitre 2, vèrset 4
J'm'êcantis à des grands travaux à m'bâti des maîsons et plianter des gardîns d'vîngnes.
Chapitre 4, vèrset 11
Épis acouo, si deux lus couochent ensembl'ye, i' lus caûffent, mais coumme tchi qu'iun peut s'caûffer à san tout seu?
Chapitre 5, vèrset 3
Les rêves veinnent auve un tas d'gênes, et la vouaix d'un nieaumîn auve un tas d'mots.
Chapitre 8, vèrset 5
Lé chein tchi garde lé c'mandement né sentitha ni n'connaitra autchun ma.
Chapitre 10, vèrsets 7-10
J'ai veu d's escliaves à j'va et des prînces à pid coumme d's escliaves. Lé chein tchi fait eune fôsse y tchèrra, et l'chein tchi fait eune brèque dans eune muthâle s'sa mordu par un sèrpent. Lé chein tchi cârrie des pièrres en s'sa êglianmi; et l'chein tchi bûche du bouais en s'sa m'nichi. Si l'fé est tron et nou n'en affile pon l'tranchant, i' faut faithe sèrvi pus d'forche; mais la sagesse aîgue à l'adgèvement.
Chapitre 10, vèrset 18
Un lief est rens'lé par la pièrcheûtheté. Eune maîson n'est pon clioutiche par des mains pièrcheûthes.
Chapitre 10, vèrset 19
Les festîns sont pouor rithe; lé vîn fait rêjoui la vie, et les sou sont bouôns pouor tout.
Chapitre 11, vèrset 5
Dé même qu'ou n'savez pon coumme tchi l'soûffl'ye entre dans l's os dans la bielle d'la méthe, ou n'savez pon coumme tchi qu'lé Bouôn Dgieu travâle pouor graie tout.
Chapitre 11, vèrsets 6-8
Lé matîn, sème ta s'menche, et l'sé, n'pièrcheûthe pon, viyant qu'tu n'sai pon letché prospéth'tha, chennechîn ou chenna, ou s'i' veindront bouôns touos les deux. Véthe la leunmiéthe est bouonne, et ch'est bein qu'les ièrs vaient l'solé. Mais ouaithe qu'la vie d'un houmme sait longue et qu'i' sait rêjoui toutes ses années, qu'i' garde dans l'esprit les jours d'nièrcheu car ches'-chîn veindront par troupieaux. Tout chein tchi veindra est d'la vandgîthe.
Chapitre 12, vèrset 9
Et la poudre s'en ritha à la tèrre comme ou y'était; et l'esprit s'en ritha au Bouon Dgieu tchi l'a donné.
Viyiz étout: