Y'a des millions d'années d'vant qu'les humains fûssent par les c'mîns et même d'vant qu'i' y'eûssent un tas d'mammiféthes, la Tèrre 'tait donminnée par des dinnosaures, des grands et des p'tits, et y'avait étout des manniéthes pathentées à râlîngues dans la mé et à ailes dans l'air - mais les cheins à pids tchi marchaient sus la tèrre 'taient techniquement chein qu'nou-s'appellent les dinnosaures.
Lé mot "dinnosaure" veint du Grèc et veurt dithe "tèrribl'ye lêzarde", mais les dinnosaures n'taient pon vraînment des lêzardes, ni manniéthement tèrribl'yes (sénon qu'iun dg'ieux 'tait d'affit d'vos mangi - mais viyant qu'les dinnosaures donminnaient la tèrre bein d'vant l'arrivée d's humain, v'là tchi n'nos gêne dgéthe)
À chu temps-là, Jèrri n'tait pon eune île, et les continnents pathaîssaient bein difféthent qué coumme j'les r'connaîssons au jour d'aniet. Duthant l'ère Jurassique (quand les dinnosaures vîndrent donminner la tèrre) y'avait pus à co un grand continnent tchi sé spartit douochement coumme les pliaques tectonniques èrmuaient par la susfache d'la plianète. À chu temps-là don, lé betchet d'tèrrain tchi d'veindrait not' Île 'tait eune partie d'un ênorme continnent et les dinnosaures éthaient pilvâtchi sus not' tèrrain duthant lus all'lies et v'nues pendant des millions d'années.
Nou n'a pon trouvé des fossiles dé dinnosaures en Jèrri - nos rotchièrs n'sont pon conv'nabl'yes pouor prêsèrver d's os coumme chenna - mais dans la Grande Tèrre et sus la côte du Sud d'l'Angliétèrre (la souô-dîthante Côte Jurassique) et en Wique étout, nou-s'a dêfoui des fossiles dé dinnosaures - par exempl'ye iun d'ches "dinnosaures Nouormands" a nom Léxovisaure d'auprès la dgaîngue dé gens tch'avaient nom Lexoviens tchi d'meuthaient là l'tou où'est qu'pus tard la ville dé Lisieux.
Les dinnosaures vivaient partoute la Tèrre. Y'en avait tchi mangeaient des pliantes, et y'en avait tchi mangeaient d'la viande: des însectes, d'aut's annimaux, des paîssons et bein seux d'aut' dinnosaures.
Parmi les dinnosaures tchi nos sont les mus connus au jour d'aniet, y'avait l'Tythannosaure Rouai (Tyrannosaurus Rex), mais y'avait étout par exempl'ye des dinnosaures à trais cônes coumme lé Tricératops, des dinnosaures à hardi long co coumme lé Brontosaure, des dinnosaures à vailes lé long du dos coumme Lé Spinosaure, des dinnosaures auve eune rangie d'pliaques avaû l'dos coumme lé Stégosaure et l'Léxovisaure, et toutes les bénites manniéthes dé -saures!
La donminnâtion des dinnosaures enduthit des millions d'années d'vant la tchête d'un météore, à chein tchi pathaît, enfouâteunmit l'atmosphéthe d'la plianète Tèrre et changit l'clyînmat tchi passecrit les dinnosaures coumme il' existaient, quâsiment d'un co dans l'pâssage du temps géologique.
Tout coumme, même si les grands dinnosaures pâssîdrent lé pas à la siette d'la tchête du météore, des pus p'tits survêtchûdrent - les cheins tch'avaient êvolué en des difféthentes bêtes tchi sont acouo à l'entou d'nous - les ouaîsieaux. Et quand eune mauve affrontée veint happer eune sannouiche ou des frites quand nou-s'est à piquenitchi nou n'est pon trop ravi qu'ch'est un fichu d'scendant des dinnosaures. I'faut êt' èrmèrciant qu'j'avons affaithe raîque auve des ouaîsieaux et pon auve lus anchêtres les dinnosaures rapacièrs.
Sus la tèrre y'avait des dinnosaures tchi marchaient à quat' dgéthets épis des cheins tchi couothaient sus lus dgéthets d'driéthe. Sus les vièrs portraits dans des livres, nou-s'înmaginnait des dinnosaures mâtes sus lus dgéthets d'driéthe à traîner lus coues driéthe ieux, mais achteu nou crait pus à co qu'les dinnosaures tchi 'taient l's anchêtres des ouaîsieaux marchaient et couothaient auve la tête baîssie et la coue tînse en l'air, raide en driéthe, à lus contré-balanchi. Et v'là tchi r'sembl'ye par exempl'ye à eune pie ou un craûlant-tchu d'au jour d'aniet.
Épis acouo, sus ches vièrs portraits qu'nou-s'êtudgiait à l'êcole y'a d's années, nou r'présentait les dinnosaures auve d'la grise pé coumme des lêzardes. Achteu nou crait qu'les dinnosaures 'taient pus à co couleuthées et qu'i' y'en avait tchi 'taient couèrts dé pliutchîn ou même dé plieunmes prînmitives - et v'là tchi dév'nait auve l'êvolution conv'nabl'ye pouor les pus p'tits dinnosaures tchi grîmpaient dans des bouais à dgêper un mio en sautant ava. Véthe, les ouaîsieaux n'sont pon êvolués des ptéthosaures, ches couôthîns des dinnosaures tchi volaient atout d's ailes dé pé, mais des dinnosaures.
La scienche des dinnosaures s'est bein êcallopée dreinement, sustout à la siette des dêfouithies qu'nou-s'a fait en Chinne où'est qu'nou-s'a dêmuchi un tas d'difféthentes manniéthes dé dinnosaures et chenna auve des dêcouvèrtes dé plieunmes et d'couleurs tch'ont changi chein qu'nou comprannait. D'aut' dêfouithies dans les d'sèrts d'l'Améthique du Nord ont continnué l'êvolution d'la scienche.
Viyiz étout: