J'ai quiqu' chose à te conter,
Mais i' n'faut pas le r'citer:
Samedi je r'venais d'la ville,
Quand tout prês de Longueville,
Un fregatin m'rattrapit,
Dit, "Bonsouair, Miss," et saluit.

Che n'tait pas la prumier fais,
Entre nous, qu'je l'rencontrais;
Ch'est un biau rouoge jeane homme,
Mais i' n'faut pas que je l'nomme;
D'vant longtemps tu le verras,
Dis me chein que tu-en creras.

Comme je hâtais men pas,
I' m'dit de ne craindre pas;
I' me pâlit de ses viages,
Me dit chein qu'il avait d'gages,
D'vant de m'quitter au carrefour,
I' m'dêcllarit sen amour.

Je ne rêpondis pas rein,
Je n'fis qu'êtreindre sa main;
Dimanche au ser à l'égllise
Je m'étais à peine assise,
Quand en rgardant à l'entou,
Je vis qu'il y-était ètou.

Je n'fis pas grande attention
Au ministre et au sermon;
Quand de l'égllise j'fus horte,
A deux-s-treis pas de la porte,
I' s'en vint à côté d'mé;
Je s'sons mariès au R'nouvé.

UN ST.-LUORENCHAIS.