En hivé, i'y'a deux ans, j'décidînmes d'aller en vacance en Laponnie au nord d'la Fînlande d'vant qu'la mode dé vie changîsse ou dispathûsse. J'voulînmes vaie les chèrs du Nord, rencontrer l'peupl'ye, faithe lé ski et vaie les Mathionnettes!
Un jour, à la pliaiche du ski, j'allînmes cachi en traîné à tchian, quand j'contrôlînmes eune liée d'quatre tchians (des huskies) halant lé traîné à grand vitesse par les sentes d'la forêt et à travèrs des lacs gelés.
Ch'tait si încriyabl'ye qué j'décidînmes d'aller en traîné à chèr du Nord! En contraste ès tchians, les chèrs du Nord couothent l'un contre l'autre et nou n'peut pas contrôler lus vitesse ou lus direction.
Nouotre chèr du Nord couothit à travèrs lé c'mîn gelé du lac à côté d'autres envèrs eune forêt d'pîns. Subitement, à mié-c'mîn i'fit un var et couothit comme un fo dans un rond et èrtouônnit sus san c'mîn! I' couothit auprès l's'autres, mais, auprès chînquante vèrges, i'fit un var à travèrs du lac eune aut'fais! J'tachînmes dé l'faithe aller pus douochement et dé l'faithe èrtouônner, mais rein n'y fit; la né 'tait pus parfonde ichîn et l'chèr du Nord s'enfannit jusqu' ès g'nouors. Et pis, auvec eune craque, iun des limons rompit, lé chèr pèrdit ses brides et s'en allit, nos laîssant ès êcouettes!
Lé dgide èrvînt pouor nos chèrchi auvec san traîné à moto et nos dit dé monter en driéthe dé li. J'descendînmes sus lé lac gelé et înmédiatement j'enfoncînmes jusqu' ès g'nouors! Lé dgide nos dit d'faithe un pas directément sus san traîné, don, j'montînmes notr' traîné acouo et j'tâchînmes dé faithe tch'est qu'il avait dit. Toutefais, la combinnaison dé nouot' paids et sén accélérâtion fit sa machinne s'enfoncer dans la né et hardi dé brun pité nos arrosit. Lé lac n'tait pas compliètement gelé! J'avanchînmes hardi douochement, comme lé dgide bîndit dé haut en bas pouor obténîn du frottage et enfîn, j'èrtouônnînmes pouor èrquémenchi auvec un pus docile chèr!
Chutte fais notr' chèr couothit auprès l's autres et marchit trantchil'yement en driéthe d'ieux, tandis qu'not' fo chèr marchait douochement à côté du chef d'la lîngne – sans notr' traîné, naturellement!
Ralph Nichols
Viyiz étout: