Les Pages Jèrriaises

CHANSONS JERSIAISES

Ov te, Marie,
Je l'avais rêsolu,
D'passer la vie
Tu ne l'as pas voulu:
Et pourtant pour te pllaire,
J'érais 'tè prêt à faire,
De jour en jour
Tout pour te, men amour.

Douoche Marie,
Ne m'traite pon ov dêdain;
Oh! je t'en prie,
Ne r'fuses pas ma main:
N'airas-tu pon par chance
Pitqi de ma souffrance;
Pour men bonheur
Laisse mollir ten coeur.

Belle Marie,
Tu-es un ange pour me;
Oh! ma chérie,
Tréjous je pense en te;
Ah; ne sais pon si fiere
Ecoute ma priere
Rends me heureux
Met le comblle à mes voeux.

 

 

Voulous saver le moyen d'être heureux?
J' l'ai êprouvè ch'est pourquoi j'en sis seux:
Que l' temps sait bé ou qu'i sait laid, n'importe.
Qu'i' sait fraid, qu'i' sait caud j'agis d'la sorte;
Je gnolle et bais et me moque des sots
Qui tréjous battent un' longue haleine:
Je gnolle et bais et me moque des fos
Qui de l'avnin sont tréjous en peine.

Ne nouos gênons jamais du lendemain,
Si l'present est bon jouissons du certain;
Profitons du pus biau temps de la vie,
Du restant ne nouos soucions pas un' mie
Gnollons, bevons et moquons-nous des sots
Qui tréjous hallent une longue haleine;
Gnollons et bevons et moquons-nous des fos
Qui de l'avnin sont tréjous en peine.

 

 

S' ous voulez veîr des hardelles,
Allez vite à St.-Aubin;
Il y-en a et qui sont belles,
Et qui sont tout à fretin
Par le railway,
Par le railway,
Et à la lueur des êtelles
Allez vite à St.-Aubin.

 

 

Bevons tous une fais à la ronde,
La canne est plleine et l'cidre bon,
Tonton, tonton, tontaine, tonton;
I' faut s'divertir dans chu monde,
Pour'qu'est que nou ne le f'rait pon,
Tonton, tontaine, tonton.

Et pis aupres qu'nou se d'sengnie
A chanter quiq' bouanne chanson
Tonton, tonton, tontaine, tonton
Car qu'est que che s'rait que la vie,
Sans parfois un ptit d'rêvillon
Tonton, tontaine, tonton.

Tandis-que nouz est en haleine,
I' faut danser un rigodon,
Tonton, tonton, tontaine, tonton.
A chonna nou n'trouve aucune peine
Nou peut s'grêz sans pifre ou violon
Tonton, tontaine, tonton.

Mais pour que ch'sait un' bouanne affaire,
I' faut qu'il y-ait du cotillon
Tonton, tonton, tontaine, tonton;
V'la m'n avis ous pouvez en crere,
Là d'sus un fameux vier garçon,
Tonton, tontaine, tonton.

 

 

Viyiz étout:

 

Les Pages Jèrriaises