J'espèthe que vous avez touos passé un buan Noué et que l'pirot ou l'picot était stuffé avec de tchi buan.
P't'être bein qu'a tchiques uns y faudrait des salts mais n'v'la qui s'passera et oprès touot ch'n'est pon touos les jours Noué.
Quand à mé, y faut que j'dise que j'sis bein erconnaissante ès sîens qui pensites à mé et apportites des poummes à l'office pouor les p'tits Caouains qui s'en vont aver des bourdelots pouor tchi temps achteu. D'autres apportites des carottes. Et bein n'v'la qui m'fit hardi plaisi que d'vais qu'nous pense tchique fais à chutte Marie et à sa pouochinée, car il y en a tant qui voudraient m'vais de l'autre bord de chu monde de minsèthe que j'sis bein aise d'vais que touos n'sont pon du même avis.
I n'est pas neuches touos les jours et pouor dithe la vérithèt oprès un buan dinèth d'Noué l'pièthe est d'aver à travailli mais quand nous a affaithe à un boss qui est tétouanne de sa sorte y faut bein faithe couomme y dit et ch'est pouortchi qui faut que j'vos raconte tchique p'tites scènes qui s'passites il y a tchiques jours de chunna.
D'vant y faut que j'vos dise qu'Edmund, l'sien qui fut mins mort sus la gazette et ressuscité sus la gazette d'oprès s'en vint à l'office l'autre arlevee pouor montrer au boss qu'il tait encouore de chu monde et qu'il allait allright mais l'boss n'tait pon à l'office pouor chaqui d'main avec l'sien qu'il avait tué sus sa gazette! Quand il apprins chutte visite y s'fit que pouor une fais ch'tait avec l'pus grand plaisi qu'il aurait fait d'ses excuses et d'mettre dans sa gazette “Not dead, but still living.”
Quant à mé, j'espèthe qu'Edmund mangera encouore bé des fais du puddin d'Noué.
Dans la paraisse au Maistre des Près, il y eiut l'autre séthée un grand dinéth pouor les siens du carnava de chutte paraisse.
Ch'tait un raide buan dinèth et si l'gros George faille s'rompre l'co en descendant un p'tit trop vite les degrés, ch'tait viyant qu'ils n'ont pon encouore l'electric light dans chutte hotel.
J'voudrais bein saver pouortchi que l'gros Jack de Fauvic était si enragi. P't'être qu'il avait mangi d'tchi qui n'allait pon en accord avec son estomac. N'v'la qu'est grand dommage, mais quand nous est en compagnie y faut saver n'penser qu'au fun et at pliaisi.
L'buanhomme Jack était là éttout et quassiment tout l'temps y chipotait ovec l'grand Dolphus d'oprès l'Eglise. Quant vint un temps l'buanhomme, pouor montrer a nos gens qu'il 'tait un miot sportsmen de sa sorte, s'fit qu'il tait prèt à haller sa casaque pouor montrer à nos gens qu'il savait bein boxer même avec un homme de paids, couomme Dolphus. Hear, hear, man vièr Jack.
Dans la nièt, d'ver deux ou trais heuthes du matin, j'etais jutchie dans ieun des bouais iou que “mon plaisir” est de dormir un miot quand j'sis de chu bord. Tout a coup j'eut grand peur, criyant que ch'tait du pliomb d'un fusil de chasse. Nennin, ch'tait du gravi, une poignie, qui s'n'alli voler contre l'ozaine à ieun des grands d'la paraisse. Chu grand homme s'déshalli de san liet et j'ouit une voix s'faithe: “Voudrais-tu téléphoner à la Wimbledon pour m'faithe envier ma casaque et ma tunette, car m'sis meprins.”
Ch'tait vrai et l'pus bé de l'histoire ch'est que buanhomme avait la casaque et la tunette du sien avec tchi il s'tait picagné touote la séthée.
Achteu, qui fit chutte méprinse car j'sais bein èttout que c'tait quand l'buanhomme sortait de l'hotel que nous ly remins chutte casaque et chutte tunette.
Touot chunna est la pure, plieine et entièthe vérithèt, fouai de Marie Hibou.
Caouain
1924
Viyiz étout:
