Ch'n'est pon du gnollin mais la pure, pliaine et entièthe vérithèt, fouai de Marie Hibou, chein que j'vas vous raconter.

D'pis tchique temps, l'Jack Washington, d'la paraisse au Grand Maître des prés, avait promins à son frèthe d'ly prêter l'poney et la p'tite vêtuthe pouor l'carnava dans la paraisse au buan bergi, et y s'fit qu'il irait l'vais l'arlevée de chu grand jour.

L'Frainque, ieun d's'amins au buanhomme, avait promins de l'prendre dans san van viyant qu'il avait l'idée d'y aller avec les femmes et les mousses et l'affaithe était entendue d'même. L'buanhomme Jack Washington s'faisait jouaie de chu pic-nique viyant que ch'tait la prumièthe fais qu'il allait vais un carnava...

Au matin, couomme y versait pluie, l'amin Frainque vint dire au buanhomme Jack, que viyant l'temps y n'fallait pon compter sus ly. Viyant chunna, l'buanhomme s'fit: J'avons promins à notre frèthe d'y aller et j'allons y aller. Y pensi qu'il avait juste l'temps de se rendre en ville pouor prendre la bus de la J.M.T. mais quand il arrive sus l'Weighbridge la buss était déjà horte et il n'en vit que l'ponsi.

A l'office nous ly dit que la préchaine buss n'tait pon d'vant chinq heuthes et pouor passer l'temps il alli s'mettre à l'abri dans une maison du vaisiné et jouit ès dominos en attendant l'heuthe de s'faithe rouoler en motor jusque dans la paraisse du buan bergi.

Quand j'y alli mé même j'vit l'buanhomme qui s'amusait couomme un jeune corps et acatait une demi douzaine de pouques de confettis à la fais. Tchi fun, garçons, couomme y s'faisait, et tchi biau carnava. Et tchiques fais quant il n'avait pon l'temps d'haller une poignie de confettis, il enviait pouque et touot. Attends, que je vais tchique jeune hardelle pouor ly en pitchi une poignie que j'l'entendis s'faithe. Quant vint un temps, l'pouorre buanhomme d'vint la target d'une p'tite djingue et j'criyais qui s'en allait être êtouffé ou stuffer avec les confettis.

Couomme j'avais du travas à faithe en ville pouor l'boss, j'm'en r'vint de buanne heuthe mais d'ver onze heuthes du sé j'fut touot surprins d'vais descendre du Caesarean Club et monter dans un motor l'grand Jack, l'enregistreur d'la paraisse à Jack Washington, un ministre et un faiseur d'vendues. Y faut craithe que chu ministre était bein amusant car nous pouvait ouïr les rires des siens du cliub quassiment à un quart de mille de distance.

Couomme j'sis un miot tchutieuse d'ma sorte, j'pensi y faut que j'couorre soutre chu motor pouor vais tchès que chunna veur dithe car à dithèt heure ch'n'est pon pouor un baptême ni pouor des neuches que chu ministre ès par les qu'mins avec l'enregistreur.

L'motor s'arrêti sièz l'enregistreur. J'pensi que ch'tait p't'être pouor ly permettre d'prendre ieun de ses registres, mais quand j'vit Moussieu l'ministre s'n'aller à son touot seu sièz l'buanhomme Jack j'pensi: Y faut craithe qu'il y a ieut tchique malheu, mais èttout l'pouor vi oprès aver été astitchi d'même avec des confettis pourrait bein en être à maintchi étouffé.

J'attendis tchique temps pouor vais sis Moussieu le ministre s'n'allait sortir et couomme y versait d'plyie j'm'en r'touorni s'en en saver pus long.

Samedi matin, j'étais à l'office a lus aidji à patchi des gazettes quand j'eut l'plaisi d'vais passer l'buanhomme Jack dans Mulcaster Street et j'criyais qu'il s'était trompé de porte quand je l'vit entrer dans l'office du faiseur d'vendues qui avait conduit l'ministre dans son motor l'sé du carnava.

Tchès que chunna veur dithe, que j'pensi à mé même, et ma fé m'v'la hors souotre l'buanhomme qui n'm'vit pon en tout pon pus que l'faiseur de vendue, car je me jutchi drièthe un tas de livres dans tchi qu'était écrit touot chein qu'il y a de bé au Canada. Bé seur, que ch'n'tait pon pouor aver une vendue ou pouor bootchy un tichèt pouor l'Canada que l'buanhomme s'tait rendu dans chutte office.

Y lus dit qui v'nait chercher le patchèt. Tchi patchèt qu'nous ly d'mandi? Mon chapé, s'il vos pliait, - un gris chapé touot neuf qu'il avait acaté sièz Amy et fils, dans Queen Street. Et dedans une pouque en papi y déshalli... un chapé d'ministre qu'il avait prins par méprinse dans l'Coumitté room l'ser du carnava. Car, ch'tait ly même, l'buanhomme Jack Washington, que j'avais prins pouor un ministre viyant chu chapé qu'nous ly avait mins sus la tête et ch'n'est que le lendemain au matin qui s'aperchut de chutte méprinse qui m'fit penser, bête que j'sis, que p't'être man vièr amin avait ieut un accident.

Quand l'faiseur de vendues oui l'explication, y s'fit que Moussieu Gruchy ly avait téléphoné tchique temps de d'vant pouor ly r'cliamer son chapé. L'buanhomme, tandis qu'nous téléphonait à Moussieu Gruchy, s'd'mandait tchès qu'allait en penser Moussieu l'Recteur! Ch'tait une autre méprinse de sa part, car j'sais bein que ch'n'tait pon Moussieu l'Recteur qui réponnit qu'il allait envièth l'chapé en ville, mais ch'tait Mess Gruchy l'cycliste. Et Mardi l'buanhomme eut l'plîaisi d'raver son chapé gris.

N'v'la la fin de chutte affaithe qui, encouore une fais est la pure, pliaine et entièthe verithèt.