Faut pon craithe un mot d'chein que l'Sieur Caouain mint
Faut pon craithe un mot d'chein que l'Sieur Caouain mint dans la gazette de Samedi passé, car jamais de sa vie chut oisé là n'aura l'honneur d'être proposi couomme candidat à autchun poste et encouore bé moins couomme membre des Etats.
D'abord, tchi qui voudrait s'risqui à l'proposer et iou qu'nous trouverait les électeurs pouor signer son papi d'nomination?
Oprès tout, nouos peux ly faithe accraithe bein des choses, mais pouor seur, nous n'voudrait pon pousser l'affaithe trop liain d'peux d'être mins dans l'embarras ou sous tchuratelle pouor aver fait preuve de si peu d'avis.
Ch'est pourtchi jamais l'Sieur Caouain n's'ra un homme public, et mé j'n s'rais pon une femme... d'homme public!
Fouai de Marie, l'année tchi veint, pouor la bordée d'élection générale pouor députés, en ville il y aura du fun.
* * *
A touotes les bordées d'visites de brancages, il y a tréjous tchiques petites scènes, surtout au sé, oprès un buan dîner et, couomme disent les normands de l'autre bord, oprès l'pousse café.
Mais ch'n'est pon souvent que la prumièthe amende est levée contre les grands d'la paraisse et ch'est chunna qui s'passi l'autre jour dans ieunne des p'tites paraisses. Ch'tait les bouaies d'oprès l'chumetièthe qui en fûtes la cause et achteu j'me demande si les Surveillants s'en vont payi l'amende d'lus pouchette ou bein s'ils vont d'mander à l'assembliaie d'paraisse d'en voter l'montant.
Chunna est la pure vérithèt, fouai de Marie Hibou, et si les autres en font une riselée, les Surveillants de chutte paraisse n'peuvent pas en rithe, car d'pis que ch'est la louai y faudra payi l'montant.
D'pis que ch'est d'même, j'ai une idée. Que les Surveillants exigent un rechu, qu'ils acatent un frame siez Woolworth et au préchain bézar pour l'Eglise qu'nous vende l'touot à tchi qui dira pus.
J'gage qu'il y en aurait pus d'ieun à bidder pouor acater chu frame avec dithèt rechu.
* * *
Il y a tchiques semaines de chunna, y s'passi dans une p'tite paraisse une bé drôle d'affaithe.
Il y avait une assembliaie et ieun de ceux qui fut grand dans sa paraisse s'y rendit.
Ieun des siens qui était là s'lèvi et fit la r'merque qu'il y avait un étrangi. Et couomme étrangi ch'tait notre homme qui voulait dithe et qui fut l'prumi surprins.
Ch'est qu'il y eut un miot de d'vis et touos n'taient point de buanne humeuthe.
Tchès qu'tu veur, mon pouor homme, chest la louai et pouor aver drouait à l'assembliaie y n'suffit pon d'en aver fait partie de d'vant
ex-officio; nennin, y faut être taxé tant d'quartiers au rât pouor aver l'drouait d'principa d'paraisse et vouaie à l'assembliaie.
Chunna est la pure vérithèt êt-tout et si vous voulez saver dans tchi paraisse chunna s'passi, d'mandez le au Connaîtable de... la paraisse iou que chunna s'passi!
Marie Hibou
1924
Viyiz étout: