A M. L'Editeu d'la “Nouvelle Chronique”
Man chier anmin, j'voudrais bein allé t'vais chichun d'shés jour, car j'cré q'tu dai aitre dé bouone humeur, car tan “cash box” dai se rempli, touos chès fermièrs chi vont “squaré lus accounts” à t'noffice té font souorithe j'en sis seux. Ch'nest pon q'tu nel mérithe, car tués un bouon garçon et tu lus donne tréjous avis d'né faithe pon tro de patates, mais vé tu bein tu tais trompai chute fais en lus donnant ch'tavis là, car s'il en avès fai chent vrégis chachun, (ou au average) bein entendu, y sreais ocquo pus contants, sinon chi voudrais bâti d'autre banques, car les siennes que j'avons ne pouorraient pas contenin touos les sous chi voudrais y mettre. Enfin, chier anmin, j'sis bein aise pour yieux, pour té et pour mé, et pour tous, car tu pouorras erchévé les gazettes et mé mes rentes, et tout le monde essa content. A bon d'yieux pouorrais t'achatai té et ta boutique, acheteu, quoique tu vaux tan pès en or et ta gazette étou, par les bouons avis que tu lus dounne, continue don man garçon et j'té souhaite tout bonheur et prospéritai et à tà missis étou, et j'espèthe qu'avec tous chès sous chi tés sont ervénus ou pouorrais allé faithe vôte p'tit viage de couotume et nos racontai tout ch'là comme un papi de musique, quand tu rveindras. Abetôt, compliement à misses.
A. Wellwisher
Nouvelle Chronique de Jersey 8/7/1891
Viyiz étout: