|
Hièr au sé d'vant les quéméreurs, la bouannefemme au Preunmié Minnistre du Rouyaume Unni fut oblyigie d'explyitchi la scandale entouor l'acat d'deux appartéments à Bristo pouor san fis tch'est êtudgiant, et ses lians auve lé galant dé s'n amie tch'avait 'té emprîsonné dans trais pays. |
|
Lé thèrmomètre a tchée à zéro d'grés; L's aéroports sont m'nichis d'êt' freunmés; Les gens es'sont bliotchis siez ieux à Noué; Et Missis Blair plieuthit à la télé. I' faut payi pus chi pouor êtudier (Mais faithe un profit sus la propriêté); Ses p'tites menneties sont toutes blianches - coumme du fé; Et Missis Blair plieuthit à la télé. Un juge né peut pon dithe la véthité; À seule fîn d'garder ses finnances en s'gret Nou s'fie, bein seu, à tchitch'un tch'a fraudé; Et Missis Blair plieuthit à la télé. Ni Saddam ni Chérie n'a dêcliathé Tout chein tch'i' veulent garder bein au privé: D's appartéments dé luxe ou des fîsées. Et Missis Blair plieuthit à la télé. N'y'étha pus d'run dans les bathis à tés; Auprès tchiques ans les morts s'sont d'sentèrrés; Pouor la Miss World des chents d'gens ont 'té tués; Et Missis Blair plieuthit à la télé.
Geraint Jennings
|