Passant nénante membres lus rêunîtent dans la Salle Pârouaîssiale dé St. Louothains vendrédi, lé 25 d'août, pour eune séthée Jèrriaise. D'vant c'menchi les affaithes, lé Président fit la beinv'nue à Moussieu George F. Le Feuvre et dit qu'les membres 'taient bein contents de l'èrvaie.
Lé rapport et la correspondance fûtent lius.
Lé restant d'la séthée 'tait dans les mains du Conmité Social.
Tous fûtent sèrvis auvec des pais au fou et du cidre à c'menchi et auprès qué tous avaient digéthé ch'na, du pâté d'pommes, gâche dé pâte et du café fûtent sèrvis.
Y'avait d'la musique par les Mêssieux L. Rondel et D. Romeril sus l'accordéon et tambours. Mde. Eileen Le Sueur jouit pour tchiques chansons, “Jean, Gros Jean”, “Frère Jacques”, “Alouette” et “Ma Modgie d'Cidre”. Auprès, les Mêssieux èrjouîtent pour tchique temps.
Lé Président fit les r'mèrciêments ès musiciens et au Conmité Social pour tout lus travas et pour aver donné eune si bouanne séthée. Tous pathaîssaient lus êt' rêjouis et s'en fûtent siez ieux bein satisfaits.
La rêunion générale annuelle étha lieu vendrédi, lé 29 dé septembre, dans la Salle Pârouaîssiale dé St. Jean. Auprès l's affaithes y'étha des portraits sus Jèrri par lé Juge R. H. Le Cornu.
1978
Viyiz étout: