Amos
Chapitre 3, vèrset 15
J'm'en vais passecrithe la maîson d'Hivé d'autant qu'la maîson d'Êté; les maîsons en iviéthe lus êcrouôl'lont et les grandes maîsons s'sont péthînmées, qu'lé Seigneu dit.
Chapitre 5, vèrsets 7-8
Vous tchi faites la jug'gie améthe coumme l'hèrbe à puches et êglianmiz la justice dans l'aithe, allez siez l'chein tchi graie Orion et la Pouochinniéthe et touônne la toute finne nièrcheu en sinne dé jeu et tchi nièrchit l'jeu en niet, tchi somme les ieaux d'la mé et les vèrse sus la fache d'la tèrre: san nom est l'Seigneu.
Chapitre 5, vèrset 11
Viyant qu'lé pouôrre houmme est pilvâtchi souos vos pids, et ou halez à li des quartchièrs d'blié; ous avez machonné des maîsons en pièrre pouor vous-mêmes, mais ou n'y s'sez siez vous, les bieaux gardîns d'vîngnes qu'ous avez plianté n'vos bâdront pon d'vîn.
Chapitre 5, vèrsets 18-19
Malheu à vous tchi veulent lé jour au Seigneu! À tchi bouôn qu'ch'est à vous? Lé jour au Seigneu est la nièrcheu au run d'la leunmiéthe. Ch'est coumme si un houmme s'êcappit à un lion et né v'là eune ourse tchi l'achîtrit; ou s'il entrit dans eune maîson et mînt sa main sus la muthâle et né v'là un sèrpent tchi l'gaffit.
Chapitre 6, vèrset 11
Êv'chîn, par la c'mande du Seigneu, la grande maîson s'sa fendue et la caûminne s'sa passecrite.
Chapitre 6, vèrset 12
Les j'vaux, couothent-i' sus un rotchi? Ch'est-i' qu'nou-s'y touônne atout des boeux? Ous avez fait l'bouôn jugement amé coumme du fyi, et du frit d'la justesse, d'l'hèrbe à puches.
Chapitre 8, vèrsets 1-3
Né v'chîn chein qu'lé Seigneu Dgieu m'mouontrit: êv'chîn eune pann'lée d'fîns frits. Et i' dit, "Tch'est qu'tu vai, Amos?"
Et j'dis, "Eune pann'lée d'fîns frits."
Épis l'Seigneu m'dit, "Né v'chîn la fîn des frits à man peupl'ye Israël; jé n'sèrcliéthai d'aut' pouor ieux. Chu jour-là les chants du palais touônn'nont en piaill'lie," qu'lé Seigneu Dgieu dit. "Y'étha des tas d'cadâvres; nou s'en va l's env'yer hors sans brit."
Viyiz étout: