Lé faignant, Thomas, et s'n anmin Aubin lus 'n allaient à pid touos les deux jusqu'à la préchaine ville, quand Thomas apèrchu eune bourse sus lé c'mîn. Vite, i' s'baissit, et quand i' r'gardit dédans, ou 'tait plienne dé billes d'un louis.
I' la fouorrit tout d'suite dans sa pouchette, et Aubin, tout content, li dit : “Man garçon, ch'est pouor nous la bouonne vie, don!”
“Nouffet-dgia!” li réponnit Thomas avec fraideu, “Pouor NOUS n'est pas bein à dithe : pouor MÉ, ch'est difféthent!”
Aubin n'dit mot ; mais en tchittant la grand' route, i' aperchûtent des voleurs muchis driéthe un bouais dans eune p'tite ruette. Thomas, trembliant, et pas sans cause, dit
“J'sommes fichus!”
“Non !” réponnit Aubin, “NOUS n'est pas lé vraie mot; mais TÉ, danme, ch'est eune aut' chose!”
Chenna dit, i' s'êcappit à travèrs des clios.
Thomas, qu'avait la frousse achteu, se trouvit gaffé par les voleurs. Trembliant, i' dêhallit la bourse dé sa pouchette et lus donnit touos les sous. I' restit là plianté d'peux dans la ruette, tandis que les vaureins lus en fûtent envèrs la ville en riant.
Chenna montre bein qué l'sien qui n'pense qu'à li-même quand la forteunne est bouonne - quand vint l'malheu, i' n'a pas d'anmins!!
Florian
Viyiz étout: