Les Pages Jèrriaises

La Preunmiéthe Lettre dé Saint Pièrre

Chapitre 1, vèrsets 3-9

Bénit sait lé Dgieu et lé Péthe dé not' Seigneu Jésû-Christ.

Dans sa grande mînséthicorde i' nos a donné eune nouvelle naîssance avec eune vivante espéthance par la résurrection dé Jésû-Christ d'la mort avec un héthitage tchi n'peut janmais péthi, corrompre ou pâsser et qu'est réservé pour vous dans l'ciel - pour vous qui êtes gardés par la puissance dé Dgieu par la fouai pour obténîn lé salut tchi s'sa êvident dans les dreins jours.

Et ch'est en chennechîn qu'ou vos réjouissez, quand même qué pour tchique temps ou d'vez souffri toutes sortes d'êpreuves. Ches êpreuves arrivent à fin qué vot' fouai, dé pus d'valeu qué d' l'or tchi péthit même après aver 'té raffiné dans l' feu, piêsse être prouvé vraîment sîncéthe en s' exprimant en louange, glouaithe et honneu quand Jésû-Christ pathaîtra. Quouaiqu'ou né l'avez pas veu, vous l'aimez; et même qué vous né lé viyiz pon à ch't heu, ou criyiz en li et ous êtes remplyis d'eune innexprînmabl'ye et glorieuse jouaie, car ou remportez lé prix dé vot' fouai, lé salut dé vos âmes.

 

Chapitre 2, vèrset 5-8

Ous êtes des pièrres vivantes pouor êt' bâties dans eune maîson d'l'esprit, un ordre saint d'minnistres pouor offri ches sacrifices d'l'esprit tchi font rêjoui l'Bouôn Dgieu par Jésû Chri, viyant qu'v'là tch'est êcrit dans l's Êcrituthes: "Êv'chîn, j'sis à pliaichi eune clié d'la votte à Sion d'grande valeu et toute spéciale; et l'houmme tch'a fouai en li né s'sa pon d'sahonté. Vous tch'avez fouai, ous en profit'tez, mais ch'est dit pouor les cheins sans fouai, "Chutte pièrre, véthe, qu'les bâtisseurs laîssîdrent horte, fut faite la preunmié pièrre du bâtisse". Épis acouo, "Eune pièrre à faithe drotchi, eune trébule; la pathole est la cause d'lus tchête pa'ce qu'i' lus y'opposent, et v'là tch'est l'affit du Bouôn Dgieu".

 

Chapitre 3, vèrsets 1-7

Femmes, séyiz gouvèrnées par vos hoummes, à seule fîn qué, même si tchiqu's'uns d'entré ieux n'êcoutent pon pa pathole, lus tchoeurs saient amendés par l'comportement d'lus femmes, quand i' vèrront vot' saint comportement dans l'respé du Bouôn Dgieu. N'vos attînf'-ous pon atout l's ornéments du corps coumme la poff'thie des g'veux, ou l'habil'lie en bijout'tie ou en bieaux fros; mais qu'vos ornéments saient les cheins d'l'houmme muchi du tchoeu, l'ornément tréjous lithant d'un doux et trantchil'ye esprit, tch'a grande valeu dans l'ièrs du Bouôn Dgieu. Et ches'-chîn 'taient l's ornéments des saintes femmes du temps pâssé, dé tchi l'espé 'tait en Dgieu, étant gouvèrnées par lus hoummes. Coumme Sara 'tait gouvèrnée par Âbréhan et l'app'lait seigneu, dé tchi ous êtes les êfants s'ou faites du bein et n'sont pon êffritées par autchun dangi. Et vous hoummes, considéthez vot' manniéthe dé vivre auve vos femmes, en honothant la femme tch'est l'pus faibl'ye vaissé, mais tch'a eune châre êgale dans l'héthitage d'la grâce d'la vie; à seule fîn qu'vos priéthes né saient pon cliogies.

 

Chapitre 3, vèrsets 1-7

Qu'les femmes lus faichent sujettes à lus propres Hoummes, à seule fîn qué, même s'i' y'en a tchi n'obéïssent pon à la Pathole, i' saient gângnis sans pathole par la convèrsâtion des Femmes, ayant veu vot' modeste convèrsâtion tch'est auve du respé, des cheinnes tchi n'sont pon attînfées par lé d'houors, tch'est tout d'la corléthie dé g'veux, d'la bijout'tie en or, ou l'engibâtréthie d'habits, mais l'houmme tch'est muchi, ch'est en tchi l'chein du tchoeu, tchi consiste en l'êtat pur d'un Esprit doux et paîsibl'ye tch'est d'grand prix l'avant à Dgieu. Car ainchîn étout aut'fais les saintes Femmes tch'espéthaient en Dgieu lus griyaient, étant sujettes à lus Hoummes; coumme Sara obéïssait à Âbréhan, l'app'lant Seigneu, dé tchi ous êtes des fil'yes en faîthant du bein, quand même ou n'êtes pon êpeûthées d'autchun êffrai. Vous hoummes, comport'-ous discrètement auve vos femmes, coumme avec un vaissé pus câsuel, lus portant respé, coumme les cheins tch'êtes étout ensembl'ye d's héthitchièrs d'la grâce d'la vie, à seule fîn qu'vos Priéthes n'es'saient pon copées.

 

Chapitre 3, vèrset 10

Si ou voulez joui d'la vie et êt' heutheux né v'chîn m'n avis - gardez vot' langue dé dithe du ma et vouos lèvres d'autchun mensonge.
 

Chapitre 4, vèrset 7

Mais la fîn d'toutes choses est d'amain; séyiz don séthieurs dans vot' comportement et vilyiz tréjous auve d'la priéthe.
 

Chapitre 5, vèrsets 1-4

Mé tchi sis iun des gouvèrneurs d'l'églyise, et un têmouain d'la mort du Christ, tchi sis pouor chârer dans la glouaithe tchi veint, j'envyie chutte quémande ès grands parmi vous: Dgettez sus l'troupé du Bouôn Dgieu qu'ou souongniz, en faîthant sèrvi vot' autorité, pon à maû gré mais d'bouôn gré; et sans penser en profiter îndîngnement mais pouor profiter l'esprit, pon coumme des hauts jutchis au d'ssus d'l'héthitage du Bouôn Dgieu, mais en vos faîthant vos-mêmes des patrons pouor l'troupé; et quand veindra l'grand Gardeux d'brébis, ou r'chévthez la couronne êtèrnelle d'la glouaithe.

 

Viyiz étout:

 

Les Pages Jèrriaises