La Section de la langue Jèrriaise

Les Fieillets Jèrriais

Juîn 2000

 

Salutâtions tout l'monde. Has the summer been and gone with the hot weekend and mid-summer's day? The last meeting was very interesting. With introductions from Geraint we started with new words (neologisms) for terms used in football and progressed to the Eisteddfod Sections that we could possibly enter, and finished by looking at photographs for a Jersey Year Book. After much amusing discussion, the proposed words were agreed as possible new ones, hopefully to be confirmed by other experts in the language. For the Eisteddfod, people expressed interest in the prepared reading and the group recitation sections, and many of John Clark's Jersey photographs could be ideal for a year book.

In view of the above, the Committee thought we should follow up the interest at the July meeting and postpone the lanes ride until we can confirm and organise it with Brian and Joyce. Consequently, our next meeting will be on Wednesday, 5th July, 2000, 8 pm in the Members' Room at La Société Jersiaise.

Enclosed is news from the Millennium Village, where Tony Scott-Warren organised the Jersey national exhibit.

A la préchaine

J. LeB. Nichols (Présidente)
R. Nichols (Ségrétaithe)

 

Lé Village du Millénaithe

I' fut dêcidé d'mèrtchi lé millénaithe auve eune village dé tentes tchi r'présent'taient les difféthentes nâtionalités et tchultuthes dé Jèrri. Y'avait l's Irlandais, l's Italiens, les Portundgais, les Chinnouais, les Thailandais, les Français, les Bangladeshis et les Hollandais et, bein seu, les Jèrriais étout.

J'fînmes eune exhibition dé textes et d'portraits pouor la tente dé Jèrri - lé vocabulaithe dé l'heuthe en Jèrriais, les saîsons, les mais, les jours - et tchiques poèmes entouor les hôlouges et les mais et les saîsons.

La Section avait eune stâle pouor vendre des livres et cassettes - et j'vendînmes un tas d'nos fieillets d'èrchettes étout.

Pouor lé c'menchement d'la s'maine du Village, d's êfants èrprésentant les difféthentes nâtionalités atchilyîtent les vîsiteurs dans lus langues nâtionales. La janne fil'ye Jèrriaise tchi pâlit en Jèrriais l'fît raide bein.

Lundi et Mardi arlévée dans la grande tente, y'avait d's èrcitâtions et des chansons en Jèrriais - et tchiqu's'uns des mousses des êcoles vîntent chanter les chansons qu'j'avions 'té à pratitchi dans les clâsses - Jean, Gros Jean et Tchi P'tit Homme. Ch'fut la preunmié fais qu'les êfants avaient chanté ensembl'ye - et en publyi étout - mais i' chantîtent bein et ch'tait bouôn pouor l'audience et les pathents.

 

Un Weekend dé Transport

Lé Départément d'la Pliann'nie et d'l'Envithonnement organîsit un weekend entouor lé transport au Mûsée à Mess Pallot à La Trinn'té lé 3 et 4 dé Juîn 2000.

Au mûsée duthant l'weekend, lé train faîsait des touônnées, bein seu, mais y'avait des stâles et d's exhibitions.

Y'avait eune vaituthe tchi fait sèrvi lé pouver solaithe. Chutte vaituthe avait gângni tchique compétition, mais nou n'lé vèrrait pon bétôt par les c'mîns d'Jèrri - ch'est pus futuristique et ou n's'en va pon rempliaîchi les vaituthes qu'j'avons achteu. Mais, ch'est la technologie tch'est du pus grand întéthêt, et j'vèrrons chutte technologie d'batt'ties et d'panneaux solaithes faits sèrvis dans lé transport à v'nîn.

Tch'est qu'i' y'avait d'pus pratique? Y'avait deux bikes êlectriques qu'nou pouvait aller sus.

I' couôtent dans les sept chents louis, et don i' n'sont pon pus chiéthes qu'les bikes à montangne bein chiéthes qu'nou-s'acate achteu.

I' sont pus b'santes qu'eune bike ordinnaithe - envithon vîngt-trais kilos - mais en pédalant nou trouve qu'lé pouver êlectrique fait la pédall'lie bein pus aîsi.

Ch'est êtrange à c'menchi car nou pédale un p'tit mio et nou-s'avanche quâsi coumme si nou-s'avait pédalé dû. Ouaithe qu'jé n'fîssions qu'eune p'tite touônnée du bel, i' sembl'ye qu'l'avantage est bein pus r'mèrquabl'ye en allant amont un mont.

Nou peut touônner hors lé pouver êlectrique et pédaler tout sîmpl'yement, mais pus nou pédale, pus lé pouver êlectrique vos aîgue. Chenna pouôrrait convaincre les gens d'faithe pus d'lus viages sus bike, j'crais.

Les boulants êlectriques n'étaient pon les seuls exempl'yes d'altèrnatifs à la pétrole. La Pâraîsse dé St. Hélyi mouontrait ses vainnes à gaz. Ch'est l'avis d'la Pârâisse qu'i' faut rêduithe la pollution en Ville et don la meunicipalité est à changi ses boulants et à întroduithe des boulants tchi font sèrvi l'gaz. Et ch'est eune bouonne idée d'la pointe dé veue des contribuabl'yes étout viyant qué l'gaz est mains chi qu'la pétrole.

La police sont d's anmîns d'l'envithonnement étout. I' mouontrait eune vaituthe êlectrique. Y'a des gens tchi craient qué ch'est bouon étout pouor happer les crînminels - les policemen peuvent lus appréchi des malfaîteurs sans trop d'brit!

Pouor les handicapés, y'avait eune tchaîse à reues tchi lus aîgue à aller sus la grève. Rouôler sus l'sablion n'est pon aîsi pouor les gens tchi font sèrvi eune tchaîse à reues, mais ch't' învention aîgu'tha l'accès.

Y'avait un tas d'gens - et d'mousses sustout - tchi lus rêjouissaient d'faithe eune touônnée dans l'train. Mais tchi feunmée! Si l'message du weekend 'tait d'rêduithe lé ma fait par lé transport, ch'n'est pon l'train tchi lé f'tha.

Mais ch'tait eune opporteunité dé distchuter les problièmes du transport et du trafi en Jèrri.

 

 

La Section de la langue Jèrriaise
  R'tou à la page d'siez-mé | Back to home page