Les Pages Jèrriaises

La Vielle Tchaise


Oui! j'l'aime la vielle tchaise,
Quouaiqu'ou n'est pon bein belle,
Quand j'sis d'dans j'sis à m'n aise,
En liêsant les nouvelles;
Et quand j'sis fatidgi
J'm'envyie d'dans pouor dormi.

Oui! j'l'aime la vielle tchaise
Pouor l'amour des vielles gens,
Oulle est couleu d'ardouaise
Par la londgeu du temps,
Mais n'importe coumme oulle est,
J'l'aime et v'la qu'ch'est.

Oui! j'l'aime la vielle tchaise,
Car ou m'fait m'rassouv'nîn
Quand ma grand'méthe Falaise
S'y mettait pouor renflier;
Ah! où'est qu'est chu temps là,
Nan, janmais i'né r'veindra.

Oui! j'l'aime la vielle tchaise
Car s'ou pouvait pâler
Ou racont'tait les rêves
Dé ma couôsinne Whitlé,
Quand ou faîthait l'amour
Auve le vièr Jean D'La Cour.

Oui! j'l'aime la vielle tchaise
Quouaiqu' oulle ait pus d'chent ans,
Nou-s y'est si à s'n aise,
Eune fais qu' nou-s-est d'dans,
Nou n'peut pon s'en r'léver,
Ch'est coumme l'aimant sus l'acyi.

Oui! j'l'aime la vielle tchaise,
J'éthais r'gret d'm'en dêfaithe,
Et j'l'aimthai sans cêsse
Pouor l'amour d'man grand'péthe,
Tchi nos chantait des vers
Assis d'dans touos les siers.

Sa vielle tchaise est acouo là,
Mais l'bouonhomme est parti,
Janmais nou n'lé r'verra,
Tout est fini pouor li,
Mais j'en aime la mémouaithe!
J'n'en peux pus - i'faut m'taithe.

 

Viyiz étout:

 

Les Pages Jèrriaises